中環在線 - 李華華 2016年1月22日
中環在線：超人聘文膽 奀過金管局前筆神
年薪百萬VS年薪300萬
■李嘉誠用百萬年薪請中文主任，人工好似奀咗啲。 資料圖片
長和（001）主席李嘉誠早排出過百萬年薪請中文主任，聽落出手都幾decent，不過唔少人都話，做得富豪級文膽，月薪得8萬幾，好似奀咗啲。究竟文膽人工應該值幾多？
「金融沙皇」金管局前總裁任志剛在位時，有位專用文膽，就係機構拓展及營運部前助理總裁文基賢（Christopher Munn），在局內有「筆神」美譽。任總英文叻據聞都親口讚過文基賢支筆掂。任總所有演辭或專欄《觀點》文章，都經過Chris潤飾，遇到開正佢嗰瓣嘅題目，仲會自己操刀㖭。文基賢係政務主任出身，熟中國文化，廣東話仲「嘞嘞聲」。98年加入出名人工高嘅金管局，05年升做助理總裁，呢個位年薪起碼300萬元樓上。
■金管局前筆神 文基賢（Christopher Munn） 
陳啟宗親自寫「萬言書」
其他「大孖沙」唔係個個有文膽服侍，聽聞新地（016）有中英文老師各一，專門幫手睇下主席講稿、年度報告等。至於恒地（012）主席李兆基，同嘉華（173）主席呂志和，平日見傳媒金句多多又鬼馬，不過公司大部份文案都係靠企業傳訊部負責。
近幾年新世界（017）年報幾有突破，主席的話成日引經據典，歷史文化氣息即時多咗。雖則都係冇文膽一職，但聽講主席鄭家純同副主席鄭志剛會落「最高指示」，總之成本嘢個風格要「夠Grand」。恒隆（101）主席陳啟宗更加唔使請文膽，每年業績董事會前一晚會親自操刀，用英文通宵寫「萬言書」主席報告！
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.apple.nextmedia.com
