魚樂無窮：博反彈三個指標
大帽山港女舌戰封路警員，成為近期寒流襲港嘅焦點，其實，跌至冰點嘅金融市場，亦有兩大高手鬥嘴，好過睇戲。
高手一︰索羅斯。一方面狂吹淡風，指中國經濟將會硬著陸；另方面打曬開口牌，話自己已經沽空美股同亞洲貨幣，擺明要食大茶飯。
高手二︰阿爺。喉舌報《人民日報》海
外版財經頭條11粒大字︰「做空中國者終將敗於市場」，曲線將支爆論調推翻。
現階段未知鹿死誰手，但正如港女話齋︰「我哋有危險我哋會自己負責，條命係我哋自己㗎嘛。」如果套用喺股市，一流！港滙企穩、油價反彈、日圓回軟，支持港股繼續反彈，短炒造好造淡，記住睇實呢3個指標。個股方面，盈進（1386）落實賣盤，每股全購價1.233元，在要約截止前，可視為包底價，新主中國消費養老控股，齋睇個名已概念十足，同屬全購股嘅馬仕達（3966），曾經逆市最多升逾一倍，而家入場買盈進，用幾格博一個憧憬，好抵玩！市值唔夠4億嘅迪臣發展（262），嚟個谷底反彈，話唔定有好消息跟尾，同樣可以兼顧。
唐牛
https://www.facebook.com/tongcow88
本欄逢周二、四刊出
唐牛
魚樂無窮 - 唐牛 舊文
來源 source: http://hk.apple.nextmedia.com
