高盛睇好
2016/01/26 09:04:54
網誌分類: 時事
油價繼續成為股市的指揮棒，美股上周四、周五在油價大彈下反彈，但好景未能持續，昨日油價回軟，美股再度腳軟。杜指跌208點，收報208點，收報15885點，差不多抹去了上周五的所有升幅; 標普500指數跌20點，收報1877點
，而納指跌73點至4528點，跌幅都係1.6%。
有報導指伊朗的運油船上周開始啟航運油到南韓，而此前市場預期伊朗經濟解禁初期的原油產量每日37至38萬桶，伊朗方面昨日表示每日產量40萬桶，下個月更會加到50萬桶，令現時石油供過於求達到每日150萬桶的情況，更形惡劣。消息令到紐約期油跌超過5%至每桶30.39美元。能源股再度受到重擊，整體大跌超過4.5%！
對於伊朗石油重投市場對國際油價的影響，富國銀行（Wells Fargo）昨日出報告話，伊朗每天產油量50萬桶相對於全球每日的達到9400萬桶產量，其實影響唔大，所以油價不至於會有太大實質影響。
但前美國能源部長及新麥西哥州州長Bill Richardson唔同意呢個睇法，佢話沙特係世界最大石油出口國，所以沙特係油價的關鍵，如果沙特同意召開石油出口國組織（OPEC）緊急會議，決定減產，油價就有轉機，不過呢種情況唔可能出現，原因係油價已經變成地緣政治的其中一項武器，由於由遜尼派主政的沙特，憎恨什葉派控制下的伊朗，沙特當然唔想伊朗經濟有轉機，而石油收入係伊的經濟支柱，所以唔會俾油價回升住，沙特此前表明唔會減產，而且瘋狂泵油，除咗要挾死美國的頁岩油生產商之外，更要借低油價打擊伊朗經濟。
不過，Bill Richardson補充，要再過幾個星期，伊朗石油全面投產，進入市場以後，對油價的影響才會顯現。不過，佢預計，壞消息確定後，油價又會穩定落嚟，對股市有穩定作用。
在這樣複雜的經濟及政治形勢之下，市場對於石油的前景愈來愈悲觀，投資刊物《The Gartman Letter》創辦人Dennis Gartman昨日表示，佢預計紐約油價會跌至每桶22美元之後反彈，估計會在每桶37美元水平左右浮沉，佢認為在他有生之年，都唔會見到油價重上每桶44美元樓上(?，有生之年咁大鑊?!)。
高盛此前預計油價有機會跌至每桶20美元水平，但佢對美股今年的前景，又未至於咁淡，高盛昨日表示維持今年標普500指數將會反彈，年底目標2100點的預期，換句話說，離現水平有大約11%的上升空間。
高盛首席美股策略師David Kostin發報告指出，美股下跌因為投資者怕現時接貨，好像接一把由高空跌落嚟的刀，好易損手；其次，正在收縮的美國製造業正拖累消費回軟；第三係油價的大跌，令到商業投資縮減；第四是中國經濟減慢觸發了全球性通縮；最後就後對股市繼續下跌的預期上升，投資者正在等股市再跌多些才入市。
David Kostin的結論係，對於認為美國經濟不會出現衰退的投資者，標普500指數現時已經跌得咁低，正係一個可以買入的好時機。至於那些擔心經濟衰退的投資，高盛的建議買入有良好資產負債表及內銷業績好的股份，即使在下行的經濟情況下，仍然可以相對地跑贏大市。 一直睇好美股的高盛，似乎未放棄好友的立場。
美銀美林的分析員則表示，在最近的12個月，資金流入債市創出高峰，顯示市場對美國經濟衰退預期升溫，但由股市流出的資令超過250億美元，亦表明投資者有這個擔心，但未去到恐慌的階段。
陸羽仁
回應(4) 我想回應
陸羽仁 BLOG 舊文
來源 source: http://blogcity.me
