中環在線：唔知網民罷睇《賭城3》
葉茂林無奈「係咪揀錯？」
耀才證券（1428）近年開始喺新春期間包場，請客仔睇電影，舊年請睇《12金鴨》，不過今年佢老闆葉茂林好揀唔揀，揀咗一部被網民呼籲罷睇嘅《賭城風雲3》，唔通葉老闆好想表態支持導演王晶？不過，葉茂林對於網民呼籲罷睇一事，好似一
頭霧水，狀甚無辜咁反問一句：「我係咪揀錯咗？」
王晶近年嘅言論唔討好，不時被網民圍插，佢同劉偉強聯手執導嘅賀歲片《賭城風雲3》上映，即有網民呼籲罷睇，王晶就冇乜所謂，回應話「香港票房係內地25分1」，又話「舊年都有人話唔睇，結果我咪又係第一」，令人討厭加討厭。
包場請客花費50萬
咁啱耀才最近宣佈，星期日（本月21日）喺銅鑼灣一間戲院包場請客睇戲，佢哋喺新聞稿度話，今年係「千挑萬選」揀中《賭城風雲3》呢齣賀歲片，認真令人O曬嘴。華華噚日搵葉茂林問個究竟，佢顯得一頭霧水，好似真係唔知有網民發起罷睇行動。
佢解釋，揀呢齣戲純粹因為故仔同賭有關，覺得適合買賣股票嘅客仔去睇，而且戲中有多位本港紅星，周潤發又肯定有號召力，總之佢都係想客人睇得開心㗎啫，冇諗過導演係唔係王晶。講講嚇，佢仲反問咗句：「我係咪揀錯咗？」
耀才早前更換公司logo顏色，由前棗紅色改為橙色，葉老闆仲話想藉此飛甩老土形象，吸引多啲年輕客戶，𠵱家網民多數係年輕人，所以話呢，葉老闆問係咪揀錯咗，答案要由佢自己諗喇。佢哋就預咗呢次請睇戲活動要花費接近50萬元。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.apple.nextmedia.com
