中環在線：出席上市公司商會新春聯誼
陳家強羅嘉瑞畀面梁伯韜
■梁伯韜（右）好落力同台上嘉賓祝酒，陳家強（左）都笑曬。 潘浩欣攝
新正頭，財經界多個商會組織都會陸續舉行新春活動聯誼，噚日上市公司商會喺灣仔皇朝會舉行酒會，舊年中擔任商會主席嘅「紅籌之父」梁伯韜，第一次做主人家，成晚笑住
口咁滿場飛招呼人。
梁伯韜噚晚心情認真靚，6點半現身，一出現就揸住酒杯周圍招呼客人。佢有番咁上下號召力，當然吸引到唔少財經名人畀面出席喇，當中包括商會創辦人、鷹君集團（041）老闆羅嘉瑞，仲有港鐵（066）主席馬時亨。
■羅嘉瑞（右）同長和副董事總經理周胡慕芳好似好啱傾喎。 
■馬時亨呢排為咗高鐵咁忙，但全無倦容。 馬時亨逗留20分鐘閃人
馬時亨近排忙住周圍做遊說工作，希望立法會議員可以高抬貴手，讓超支嘅高鐵工程繼續去馬。雖然日日馬不停蹄，但見佢十分精神，全無倦容。不過佢7點到場，大約逗留咗20分鐘左右，喺主禮嘉賓財經事務及庫務局局長陳家強致辭之前，就已經鬆人，可能有下場啩。
至於梁伯韜心情靚，除咗係主人家，亦可能同佢上月底悉售意馬國際（585）股份，套現超過2億元有關。華華噚日捉住佢，恭喜佢過年前發財，佢就笑住話，今次屬於個人投資，唔解釋咁多，總之跟意馬前主席單九良失聯無關喎。
至於價錢係咪好啱心水？佢就坦白咁話：「梗係好先賣喇，又冇人揸住支槍叫我賣！」不過，單九良舊年底失聯後，要佢做番主席，佢承認呢個係過渡安排，遲啲有新消息。
陳家強噚晚致辭時亦借機會表態，指今年新年願望係希望立法會嘅討論可以重回軌道，又話財委會與工務小組好多議案塞緊車。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.apple.nextmedia.com
