「揼石仔」建奇功
2016年02月19日
全球股市喺美國帶動下反彈，杜指連升三日，昨日輪到港股發威。呢一輪股市回升，一方面係因為早前拋售後超賣，同時亦因為資產跌產跌價潮，開始觸動各國央行神經，炒家觀望各國會否重回寬鬆政策。
去年美國由停止量化寬鬆到加息，令熱錢流向大兜轉，由商品到
股票全部大跌價，去到呢個月油價急插，連銀行都驚受影響，市場開始有聲音質疑聯儲局加錯息。大戶拋售資產同聯儲局大鬥大，都令到儲局窒一窒，日本央行玩完負利率，仲透露聲氣話可能再印銀紙救市。雖然經濟學者對印銀紙救市效力有質疑，但就俾好友一個夾倉反擊的機會。
港視勁升開逃生門
雖然內地上證綜指微軟4點收場，但昨日港股扭轉前日人升我跌的弱勢，大夾淡倉，恒指收報19363點，飆升438點；國企指數收報8166點，上揚237點，成交金額726億元。春節假後濠賭股炒番轉，金沙(1928) 、銀娛(027) 升6%，新濠(200) 更勁升9.4%。
藍籌跟市上升外，沉寂咗好耐的的香港電視(1137) 又郁吓，港視不獲發牌打官司申請司法覆核打贏政府，政府上訴的官司家審緊，法官口氣好似對港視有利，股價急升14%，收報1.51元，不過對於絕大部份小股東嚟講，如此升幅意義不大，因為隻艇開咗出大西洋，如今調轉頭行番一個鐘，仍然有排都唔會返到家鄉。我年幾前已經講，唔好俾自己政見影響投資，港視唔似攞到電視牌，所以無論你幾想港視有牌都好，若然手上有貨，每次咁樣升10幾巴仙，都係沽貨逃生的時候，沽咗將來大把機會俾你買番。
港視炒下法庭消息，但大家心知肚明，家有排都未有好消息。以目前公司持有唔夠20億元，搞網購大手燒緊錢，餘錢根本唔夠搞一個免費電視台。就算搞到，都有排唔賺錢，所以公司資產值有3.8元，但股價一半都唔到，顯示市場無人睇好也。
相比之下，原本屬於港視，賣盤後獨立上市的香港寬頻(1310) ，呢排好勤力咁「揼石仔」，股價好有表現，舊年11月後都喺高位橫行，無跟大市回落。呢個星期，香港寬頻用6.5億元，向新世界電話控股收購兩間公司全部股權。收購公司的業務是新世界在香港提供固網及寬頻電訊服務及網上營銷解決方案。
香港寬頻除了傳統的網絡業務，近日成為新興網視的最大合作夥伴，去年底同樂視合作推機頂盒，跟住又同來香港打江山的美國網上視頻巨企Netflix研究合作，最新一章係同電視廣播(511) 旗下TVB.com Limited簽訂合作備忘錄，推出內含高速光纖家居寬頻以及TVB即將面世的OTT內容服務myTV SUPER的服務組合，詳情將於3月初公佈。由於網視要入屋，除咗好似樂視咁整埋電視機，另一個方法就係賣機頂盒，咁有寬頻服務的網絡商就成為最佳拍檔，因為佢哋有龐大銷售隊伍，搭佢推埋機頂盒都好啱數。
香港寬頻積小勝成大勝
除咗同網視全面合作，香港寬頻另一奇招係狂搶新界村屋市場，令佢喺接近飽和的市場仲可以提升佔有率。截至2015年8月31日止年度，公司住宅寬頻用戶數淨增加62000戶至754000戶，住宅ARPU按年增加5%至183港元，市場份額由2014年8月31日的34.2%上升至2015年8月31日的36.6%。由佢今次收購睇，公司已經出現規模效益，可以向其他無興趣再投入咁多資源或心機「揼石仔」的公司買入業務，做埋收買佬執平貨，希望可以積小勝成大勝。
現時香港寬頻市值100億元，市盈率雖然超過90倍，但派息率2厘。以佢係香港市場佔有率37%計，100億唔算貴，所以維持到市盈率高。昨日收9.94元，升3.3%，股價距離一年高位10.7只係8%，可見出死力「揼石仔」，揼出100億市值，仲好景過佢舊阿媽咁四圍搞創意，沽走咗香港寬頻的香港電視，如今市值得番12.2億咋，魔童王維基行錯一步，唔計佢收咗息，呢步錯棋令佢啲投資得番個零頭。
陸羽仁
金融High Tea 舊文
來源 source: http://hdfin.stheadline.com
