中環在線：分享家族企業管理
陳啟宗大仔到大學演講
■陳文博之前去科大講talk，向年輕人分享喺恒隆工作嘅經驗。
恒隆地產（101）主席陳啟宗出名口若懸河，佢講talk肯定冇悶場兼有金句派，佢位大公子陳文博平時見到傳媒唔多出聲，估唔到遺傳咗爸爸鍾意演講嘅天份，今年開始，佢到本地大學講
talk，分享自己點樣打理家族生意，兼且賣嚇藥，介紹恒隆業務。
34歲嘅陳文博現為恒隆高級經理（董事辦公室），喺恒隆工作6年，主要跟住董事總經理陳南祿學做生意，做咗咁多年，點都有啲心得同睇法。
今年3月，佢去咗中大酒店及旅遊管理學院，幫學生組織Hospitality Student Initiative，向幾十名不同地區嘅大學生，介紹恒隆業務，又講何謂EST，即係Experience、Service同Technology計劃。
上個月，佢又去科大做客席講師，為工商管理碩士（MBA）學生，講解家族企業係點樣，佢又如何接班等等，聽聞反應不俗。
度橋用科技加強生意
據講，陳文博幾鍾意跟學生分享經驗，就到時間，主題又啱嘅話，佢都會盡量抽時間出席。照咁講，關心青年事務嘅富二、三代，都唔只得華置（127）主席劉鳴煒，其他富二、三代都有心做，只係大家用嘅平台唔一樣啫。
陳文博𠵱家有份負責恒隆嘅EST計劃，即係點用科技加強傳統生意，啱曬佢呢啲後生仔。最近佢為恒隆成立咗12年嘅數學獎開facebook專頁，用作宣傳數學研究，仲好潮咁有埋片㗎。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.apple.nextmedia.com
