中環在線：金勞詹買斷《香江怒看》
若選立會 擬放fb宣傳
■詹培忠當年的《香江怒看》是亞視少有的自家製節目。 互聯網
有「潮州怒漢」之稱嘅詹培忠兩年前義助亞視，拍住資深傳媒人釁簡寧主持時事節目《香江怒看》，更加係王征年代嘅亞視少有自家製節目之一，唔講你唔知，原來金勞詹為免自己嘅節目
被人賣嚟賣去，之前索性用幾十萬同亞視買曬《香江怒看》嘅版權，仲準備一旦落實參選9月立法會選舉時放上facebook做宣傳㖭。
是咁的，有人同華華報料，話金勞詹之前喺一個飯局上自爆用咗50萬同亞視買番《香江怒看》嘅版權，噚日打畀佢求證，金勞詹就話已經係亞視執笠（應該指停播）之前嘅事，計落都係一年半載前，佢見亞視當時有經濟困難，當係施捨畀亞視，實際幾多錢佢就無講，只話係一百幾十萬咁上下啦。
自編自演 無收亞視錢
金勞詹講起，當年做《香江怒看》除咗無收過一蚊，嗰陣嘅節目內容多數係佢老人家度出嚟，講得上係自編自導自演咁話。
華華記得當年金勞詹喺節目中鬧人都幾有火，咁究竟佢買番個版權返嚟有乜大計先，直認有意出選立會嘅金勞詹話，一旦落實參選，到時需要好多唔同途徑宣傳，會考慮將節目放上facebook做宣傳。問他落實咗選邊區未？佢就話最快下星期有公佈，叫華華唔使心急。之前港視（1137）主席王維基公佈考慮參選，同樣話考慮出選港島區，咁咪隨時上演金勞詹火併魔童？金勞詹就話同邊個選埋同一區都無所謂，最重要係提供多個選擇畀市民做決定。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.apple.nextmedia.com
