智取大市：早一步勇武揸貨
美股周一休市，港股趁蜜月期繼續有鑊氣，科網股同手機股輪流炒，相關板塊波幅逐步擴大，大市成交亦逐步升溫，最急劇升勢似乎未出現，如果之後配合美股破頂就更加不得了，期望未來三幾個星期有好戲睇。
除咗上述強勢板塊之外，優質股都開始起動，可見個股升勢有蔓延跡象，係好兆
頭。信義玻璃（868）突破5.5元睇嚟都指日可待。雖然信義玻璃本來都係不錯選擇，但橫睇豎睇跟紅頂白先最有道理，所以注碼集中喺科網、手機股更實際。
論手機設備股，瑞聲科技（2018）噚日破頂，突破60元之後，周線圖如入無人之境，觀乎過往每10元會成為一個阻力區，相信幾個星期內會上試70元，有一成以上潛在升幅。買瑞聲的話，好處係容易揸得穩，但回報始終有限。波幅更大更有肉食，可以揀估值低、手執華為單嘅通達（698），當華為概念股龍頭舜宇（2382）嘅歷史市盈率去到32倍之時，通達市盈率只得13倍，縱使未來盈利增幅不及舜宇，但保持一至兩成按年盈利增幅非難事，認真抵買，以通達每逢升浪至少有0.5元漲幅計，由近期低位1.5元起步，股價破頂然後挑戰2元，似乎不難。
晉佳
http://www.facebook.com/advanceguy1
晉佳
智取大市 - 晉佳 舊文
來源 source: http://hk.apple.nextmedia.com
