有選舉 無減辣
2016年05月31日
股市五窮六絕，樓市喺5至6月都係偏向淡靜。今年股市5月成交跌到去500至600億元，交投偏淡，但美股撐住，港股唔算太差，5月仲有小小升幅，反而樓市就量價齊跌。上星期有班代理就操上金管局，要求金管局減吓辣，不過佢哋出嚟都唔見得有乜結果喎。有環茶友
踢爆，話今年立法會選舉，明年特首選舉，係咁環境下代理想減辣，似乎都幾難心想事成喎。
新盤劈價未去到盡
今年樓市下調之勢漸漸明顯，尤其係二手樓受到新盤搶客下，交投持續低迷。有地產代理於是走去金管局請願，提出放寬按揭成數，一個說法係金管局要求銀行做壓力測試，假設利息上調3厘，作為按揭政策嘅參考，但睇美國經濟唔係咁強勁，今年能否加息超過兩次都有疑問，以加息3厘呢個標準測試似乎過嚴。見完面之後，有人仲話金管局會考慮減辣，令人有所憧憬。
不過，有同金管局交往的中環茶友就對呢個說法有懷疑嘞。茶友話，美國去年首度加息，但香港因為資金多，根本無跟加，跟住儲局有可能係6或7月加息，喺咁嘅環境下，你估金管局會唔會同代理講考慮減辣呢？實際上，樓市現時調整，最大殺傷力係辣招稅，在短樓買賣樓宇要收稅下，炒樓基本上係高風險低回報嘅行為，就算銀行有錢借，係咪要入市都要諗過。無人炒，個市自然靜。
至於辣招減唔減，唔係金管局職權範圍，係睇特首同財爺點決定。如果大家有留意，特首呢兩日接受訪問雖然承認房屋問題未完全解決，但係話已經見到初步效果，仲話自己上任後無再聽到人講地產霸權，當業績嚟曬。
言下之意，即係話自己做嘅方向啱，不過要樓價租金有較大幅調整，仲要時間體現，咁講即係擺明短期唔會減辣啦！再睇真啲，9月份係立法會選舉、明年3月份特首選舉，呢啲時間相信無人想見到樓價爆升，所以點會隨便放鬆樓市政策呢？代理出嚟叫金管局減辣，相信都係明知不可為而為囉。
樓市無減辣條件，發展商現時賣樓亦都唔係劈價劈得咁緊要，佢哋主要係靠優惠去搶二手啲客，新鴻基地產(016) 就透露今年3至5月銷售達170億元，較上年7月至今年2月的110億元多，集團今年目標是銷售達320億元，先前集團諗過要降低賣樓目標，但現時都未必有咁嘅需要。新地公佈咗呢個數字後，大摩就預期佢2016財年每股盈利會有20%增長，派息則升10%，即相當於現股息率4.2厘。由於新地每股資產淨值(NAV)折讓53%，估值不貴，加上財務費用低，同時銷售執行力強，故維持「增持」評級；另一地產龍頭長實(1113) 已講明今年會加強銷售港外物業，可見大發展商都預咗無得減辣。
7月美息有機會上調，不過港股反應仲係比較溫和，恒指仲連升五個交易日，昨日最多升189點，收報20629點，升52點，五日累升820點，成交585億元。
指數上落唔大，最搶眼係幾隻大型工業科技股，同步破頂創上市新高。科網股王騰訊(700) 最高見過172.5元，升0.76%，創上市高，隨後升勢不保，全日收報2169.9元，倒跌0.76%。做鏡頭嘅舜宇(2382) 創上市新高，曾見27.6元，收報26.65元，漲4.3%；上周獲高盛升目標價的瑞聲(2018) ，股價高見63元，創上市新高，收報62.6元，升6%；仲有做傢俬嘅敏華(1999) 上個財年多賺23%兼送紅股，股價曾觸及10.7元，創上市新高，收報10.62元，升2.91%。
萬達股東趁復牌減磅
停牌多日嘅萬達商業(3699) 終於公佈，獲大股東大連萬達集團告知董事會以每股52.8元向萬達商業提出私有化，較停牌前51.25元溢價3%。通告仲講明大股東稱將不會提高要約價，假設股東悉數接納要約，預計收購總作價為344.55億元。萬達商業午後復牌後收報49.25元，跌1.5%，睇嚟有唔少股東唔想夜長夢多，所以就算同私有化價格差成6.7%都沽啲貨先。
停牌五年的嘉域集團(186) ，因達成復牌條件而恢復買賣，昨曾狂升3.13倍，最終仍大升2.07倍。嘉域停牌多年，復牌後講明要供股集資，所以佢咁升，都係有啲「乾炒牛河」嘅味道。
陸羽仁
金融High Tea 舊文
來源 source: http://hdfin.stheadline.com
