財經評論：大陸樓市有燶味
■中國好多人一生只買一層樓。 資料圖片
之前講過大陸樓市名過其實，近期再訪汕頭、惠州等地，更確信次級城市存在不少風險隱憂。現時大陸樓市炒風由一線城市順勢而下，一、二線地價太高，不少地段已呈無肉食狀態，三、四線城市的庫存仍然龐大，再拿地庫存風險太大。為了搶食，唔少開發商
一早已在一線城市周邊地區囤地，食所謂「廣深一體化」、「大深圳」這些概念。
內地人喜歡「概念」、「故事」的心態就好似中國經濟GDP一樣，明明市場睇到淡一淡，但內地人總懷抱相信國家的心，要做的，點都會做到一樣。近期到惠州非核心區周邊睇盤，接載記者去樓盤的的士大佬都非常唱好樓市，認為地鐵延伸概念好正，仲一手扭軚，一手指著遠方的草地、荒地，滿懷希望吐出一句「呢度會起高鐵」。計一計，過去一年惠州樓價已經升了一倍，市中心的淡水閒閒哋每平方米賣13,000至16,000蚊人仔，價錢已與鐵路起得七七八八、仲有自貿區概念的廣東佛山、南沙差不多，即使近郊又偏僻惠陽、大亞灣都升到每平方米八、九千蚊，翻了一番。問多幾句，原來的士大佬是受惠人士，話佢層自住樓已升了一倍。
當然做人總要信，小記都同分析員朋友傾過，呢啲概念係得嘅，因為一、二線真係唔夠地，炒落周邊地方唔奇，大陸又最喜歡起橋、起鐵路、起隧道……總之咩都起一餐，反正三、五、七年唔會爆，食住先無壞。的士大佬咁興致勃勃，我惟有弱弱問一條鐵路要搞幾多年，係咪直達樓盤時，佢就話唔清楚。講講嚇，仲良心發現叫記者買樓前要問清楚，咪畀定金同要求長啲考慮期。點解嘅？的士大佬突然食咗誠實豆沙包話，原來好多人會褪軚，突然唔買囉。
聽完個心都離一離，中國人買樓好少褪軚，好多人一生只買一層樓，會褪軚的都是春江鴨居多，當一線樓都開始縮量，有價無市，連的士司機都知道有褪軚時，大陸樓市有幾穩陣……
記者：方楚茵
財經評論 舊文
來源 source: http://hk.apple.nextmedia.com
