收市閒情：五個唔想去759的理由
■阿信屋經常有折扣優惠，一般人都不會正價去入貨。 資料圖片
我要承認，曾經我係阿信屋嘅fans，行過望一望，口痕又睇一睇，不過今時今日嘅阿信屋，就好似𠵱家呢個唔知想點嘅港股一樣，冇癮，唔想買！
（1）曾經大家鍾意阿信屋，都係鍾意嗰份驚喜！你同我都可能
曾經唔少次，發現新大陸，買咗啲零食返去，食一啖，然後：「嘩！咁好食嘅！」你諗住食過返尋味啦，點知，下次去，搵唔到；再下次去，都係冇，然後直到永遠，阿門。最灰嘅係，你買開嘅嘢會突然冇咗！阿Q精神mode，林老闆可能想借機教我哋咩叫珍惜。不過次次食完都買唔番，我真係寧願原來沒有，從來都沒有。
折扣太多反成缺點
（2）你當畀次機會佢，又畀個機會自己，行入去搵新貨。不過人會變，就好似以前旺中啲MK妹一樣，扮扮嚇㗎妹𠵱家都走去扮韓妹啦。今日嘅阿信屋，日本貨只係佔四成，好地地賣日本嘢咪算囉，走去賣勁多東歐貨，就連波蘭貨都有！波蘭呀大佬，我只係知長毛同鈺成兄去過嗰度旅行咋。
你唔係冇畀過機會佢哋㗎，但係中伏嘅機會率極高！既然係咁，值博率咁低，我何必要同銀包過唔去？
（3）阿信屋三日唔埋兩日就要689折、789折，試問精明如閣下，又點會正價走去入貨？𠵱家新會員優惠周五至周日都比平時多折，即是咁，好似I.T（999）咁，有幾多人會甘心正價行入去？
（4）林老闆接受訪問時，成日都話日圓升值會影響阿信屋盈利，經常打告急牌。個感覺就好似啲長期拉banner、聲稱執笠清貨要減價嘅舖頭，但你永遠都唔明，日圓10算嘅時候，又唔見你喊話有事？
（5）阿信屋嘅母公司CEC國際（759）股價由最癲時期嘅5蚊，跌到𠵱家得番嗰1蚊！手持蟹貨嘅阿媽會同你講：買買買，買條毛咩（女人都係方丈）！
千頌C
http://www.fb.com/winbigwok
本欄逢周三刊出
千頌C
收市閒情 - 千頌C 舊文
來源 source: http://hk.apple.nextmedia.com
