五窮跌得應
2016年05月04日
美股上日在跌穿萬八點後反彈，內地A股昨日跌穿重要心理關口3000點後大幅回升1.9%，再加上日圓升美元跌本來都利好中港經濟，可惜結果仍然無阻港股在五月首個交易日被人沽一沽，尾市跌幅仲擴大咗。
五一假後，內地經濟數據又出籠，財新中國製造業採購經理人
指數(PMI)顯示，4月錄得49.4，低於3月0.3個百分點，繼續處於50.0臨界值以下，市場原先預期略升至49.8。4月財新中國製造業PMI走勢與官方製造業PMI基本一致，4月中國官方製造業PMI為50.1%，比3月微落0.1個百分點，但仍處於擴張區間。
政治局撐內地股市
財新傳媒首席經濟學家何帆指出，數據表明當前中國經濟復甦基礎並不牢固，經濟仍在反覆築底當中，政府仍應重視經濟的下行風險。
雖然數據麻麻，但內地股市喺上證指數跌穿三千點後開始有承接。昨日高開後無理數據唔係咁靚，市況逐步推高，最後上證指數收報2992點，漲54點，又逼番近三千點關；深成指升得仲好，報10441點，升300點，兩市成交重返5000億元人民幣。內地證券界話，4月29日政治局會議罕見提到股市，顯然高層對證券市場的維穩情況更加重視，提振市場信心。加上央行今日開啟1000億逆回購，顯示節後央行繼續以補水方式投放流動性，也對內地股市有支持。
比較美股同A股，港股真係有啲唔爭氣，恒指低開後乏力，尾市沽壓加大，收報20676點，急挫390點；國企指數收報8748，下滑190點；紅籌指數收報3690，跌58點，成交775億元。財險(2838) 喺假前被基金減持，昨日大跌5.9%，唔多唔少增加咗市場利淡氣氛，加上四月唔少股份累積彈幅唔少，回吐壓力一湧現，就可以跌得幾急。
雖然五． 一期間一、二手樓交投有反彈，但市場擔心供應增加，地產股成為沽售對象。長實地產(1113) 係表現第二差嘅藍籌股，挫4.8%，造50.7元，新地(016) 造94.4元，挫3.7%；恒地(012) 走低1.8%，造47.65元。
匯控靠派息力撐
據運房局公佈最新數據顯示，今年首季新盤施工量急速彈升，谷起未來三至四年，潛在私樓供應量達9.2萬伙，為局方有紀錄以來新高，平均每年新供應逾2.3萬伙，成為拋售地產股理由。地產股喺二月份跌市後，借完開盤造勢累積反彈唔少，部份已經超過三成，喺咁嘅水位向上空間有限，股價下插反而係正常，短期就算再跌啲都唔奇。
五窮月第一個市場關心消息係匯豐控股(005) 業績，集團喺午市前公佈，首季盈利43.01億美元，按年下跌18.2%；按季由虧轉盈，去年第4季有虧損13.3億美元。每股盈利20美仙，最重要係建議派發首季股息10美仙，與去年同期不變。業績後大笨象股價逆市上升接近2%，到尾市恒指跌幅擴大，股價都被拖低埋，收報51.5元，跌0.6%，睇嚟要等個市穩定番，股價至容易炒上。
匯控行政總裁歐智華喺業績會坦承，首季生意同去年第一季比係差咗，但考慮到期間全球不明朗因素令市場波幅極大，佢自言業務都有交代。記得喺首季匯控股價大插，當時外界最擔心係佢喺能源相關的貸款會出事，結果匯控喺期內為石油及天然氣行業，以及金屬及礦業本季的貸款減值準備增加。歐智華透露，集團今年首季根據計劃目標再減少150億美元風險加權資產，但企業貸款增加，令整體風險加權資產上升。
家銀行生意唔易做，皆因信貸需求普遍疲弱，有風險嘅行業好似油企又唔想借太多。匯控今次業績同去年第四季比叫做有改善，所以就算比去年同期差咗，股價喺績後都繼續上升。踏入第二季，石油價格暫時企番穩，令跨國銀行股價唔使再尋底。匯控首季維持到派息不變，由於息率同股價比頗為吸引，令低位買貨的股東容易啲滿意，如果個市反彈，佢先有可能做番好啲。
陸羽仁
金融High Tea 舊文
來源 source: http://hdfin.stheadline.com
