賺錢企業也節流
2016年05月19日
港股再度跌穿兩萬點關，雖然暫時仲未試底，但個別股份已碌咗落低位，呢兩日傳出要節流嘅國泰航空(293) 就係其中一個例子。
早前，國泰宣佈業績，錄得近60億元純利，當時陸羽仁已經話風光背後，佢經營有壓力噃。呢個講法好快就獲市場
證實，國泰雖然盈利數字靚仔，股價卻呈現弱勢，喺公佈業績後就拾級而下，個市未跌佢先跌。呢個月股市唔好，佢昨日已插落12元，同今年低位11.06元相差不足1元，同風光嘅盈利數據完全唔相配。
國泰盈利升股價弱
國泰點解賺錢多股價弱，行政總裁朱國樑係內部刊物爆料揭露咗端倪。佢透露，由於貨運需求持續受壓，加上客運業務有轉弱跡象，導致近數星期來國泰業務面臨的挑戰愈來愈嚴峻。
國泰有見收益壓力日增，在上周四集團會議中提出三招，要求進一步控制成本。呢三招包括檢討營運和預算，尋求方法慳錢及改善生產力；其次要求各大部門檢討開支，盡可能停止一切非必要的部門自主開支；第三是暫停招聘或替補對營運非關重要的職位。
朱國樑咁講唔係話空口講白話，國泰呢個星期公佈4月份合併客、貨運量，出現明顯轉差情況。4月份載客量跌0.1%至291萬人次；乘客運載率下跌2.3個百分點至84.9%。運力則上升2.4%。相對而言，今年首3個月載客量升5.3%至860萬人次；乘客運載率跌0.8個百分點至84.1%；首季運力升6.5%，尤其頭等及商務客艙的表現未如預期，收益率仍然受壓，咁即係話生意有轉向跡象。
中環茶友話，陸羽仁唔係航空專家，點解可以預告國泰經營會轉弱呢？道理好簡單，國泰去年業績好，但唔係超好，如果你睇國泰基本經營環境，係美元強刺激外遊客運需求；加上油價急跌下，佢業績應該勁到爆炸至啱，但結果純利唔係超預期。試諗吓，油價、息口現時仍低；加上客運需求咁強勁，佢業績都唔能夠爆燈，若然油價高啲，或者生意差啲，咁佢業績就有啲危嘞。
茶友話，國泰去年業績唔爆，一個理由係對沖輸咗85億元喎。呢個講法無錯，但唔好忘記油價插到咁低，但低到咁上下就變咗易升難跌，作為航空公司唔可以長期倚賴低油價去撐住盈利。對於國泰前景，陸羽仁覺得有兩點隱憂，會明顯影響咗佢嘅估值，一係市場環境改變，國泰以往接近獨家嘅生意模式改變咗；二係營運架構係多年「半壟斷」優勢下，變得僵硬。現時管理層提出開源節流，無錯係有預見性嘅措施，不過，佢去年盈利仲處於高位，未見到盈利回落，係咁環境下要叫大家慳錢，好似唔係咁有說服力，好似你叫大家唔好請人做多啲，有無人肯聽你講呢？呢個亦係普通打工仔正常反應。國泰股價本來已超前回落，反映經濟前景轉差。管理層出招，算係積極嘅態度，但在三招未證實收效前，仲係適宜觀望住先囉。
A股昨日沽壓再現，上證指數一度失守2800關，全日收報2807點，跌36點；深指數收報9694點，跌214點。外圍及A股急挫，拖累港股向下，恒指收報19826點，下挫292點。全日下跌股份接近1300隻。公佈業績嘅騰訊控股(700) 跌咗1.1%，收報161.1元。
騰訊業績符預期
收市後騰訊公佈首季純利按年升33%至91.83億元人民幣，每股盈利98.1分，非通用會計準則應佔盈利按年升39%至100.32億元。季內收入升43%至319.95億元，首季QQ月活躍帳戶8.77億戶，按年升5.4%；收費增值服務註冊帳戶增32.7%至1.08億戶。騰訊業績對辦，對個市都算係小小好消息。
另外，「超購王」HSSP(3626) 首日掛牌，全日收報2.61元，較招股價1.36元上升92%，高位2.8元，低位2.3元，成交1.05億股，涉及金額2.72億元。不計手續費及佣金每手2000股賺2500元。不過呢啲細股，散戶唔會認購到，都係得個睇字。
陸羽仁
金融High Tea 舊文
來源 source: http://hdfin.stheadline.com
