金手指：公投後的大奇蹟日
■如脫歐，歐央行、英倫銀行、聯儲局等一定喺歐洲開市前有救市措施。 資料圖片
上周，孫柏文話英國有機會脫歐。但有位戀歐派國會議員被人殺害。襲擊致死消息一出，英鎊即刻大彈。
客觀而言，如用以前work嘅分析方法，脫歐派輸硬。不過喺新世代，人開始睇完新聞報導後，再
睇埋其他人評論篇報導想達成咩目的，主流傳媒冇人信。所以真係難講。
襲擊前，英鎊慢慢跌。襲擊後反彈，咁反彈幅度有冇準確拿捏襲擊嘅影響？所以重申上周建議，睇咗結果先至做。不過，因家陣個市預咗唔脫歐，真係脫時英鎊會跌凸。上周末做咗個投資論壇嘅講者，我提供咗個如何賭脫歐嘅路線圖同時間表。大家不妨bookmark呢篇文，睇嚇跟咗得唔得。
首先，當然要公投結果係脫歐。上周都講過，英鎊會大插。不過，周末我建議買嘅係恒指。因為香港時間早上約十時會有結果，如果脫，歐、美股市期指將跌到仆值，香港嗰朝都會跌千點。
而今時今日啲央行已當咗自己係怪獸家長。如脫歐，歐央行、英倫銀行、聯儲局等一定喺歐洲開市前有救市措施。仲要如果啲投行、大戶喺亞洲時段特登大力掟落去，啲央行就會越重手去救。
所以，我建議係一但脫歐，你就要喺香港早上11點59分，買定恒指末日牛證，跟住就等下午收錢。呢個周五，分分鐘係2016年嘅大奇蹟日啊。都大奇蹟過咁多次，冇理由唔識炒！
孫柏文
獨立股評人
http://www.fb.com/shuen
本欄逢周二刊出
孫柏文
金手指 - 孫柏文 舊文
來源 source: http://hk.apple.nextmedia.com
