賭盤顯示留歐機會急增
2016年06月21日
隨着有支持留歐的英國工黨議員被殺，英國留歐行情接連看漲，港股大幅反彈，恒指收報20510點，升340點；國企指數收報8639點，漲153點，成交只有550億元。
上星期，留歐派議員考克斯遇刺死亡，股市和鎊價隨之反彈，呢個
情況令人想起當年台灣選舉阿扁遇刺的「神奇一槍」。今次的死亡慘劇，令英國國內氣氛逆轉，有分析師形容「考克斯挽救了英國，挽救了市場。」
雖然民調仍顯示脫歐民意仍然領先，但睇賭盤最實際，好似博彩公司Betfair如今賭英國脫歐的賠率上周只是2.6倍，周六升至3.2倍，昨日升高到4.1倍，博彩盤顯示落注者認為英國脫歐機會急速下降中，而留歐賠率只有1.33倍，留歐是大熱賽果。
渣打急升要識落車
究竟最後投票結果係咪咁，仲有幾日就有答案，但炒作脫歐的氣氛就已大大沖淡，港股開市回升外，歐洲開市都造好，英鎊亦升，昨日港股升得急的主要係同呢個因素有關嘅股份，渣打(2888) 尾市一度狂飆，曾大升9.5%，最高見過62.45元，收造61.6元，急升8%；保誠(2378) 受追捧，收造146元，抽升7%；匯控(005) 漲3.5%，造49.35元，貢獻恒指67點升幅。
炒留歐概念股炒到咁上下，到家都反映咗唔少，到炒完留歐之後，投資者又會轉頭留意番基本因素，好似渣打爆上，但佢基本因素麻麻，炒到差唔多的時候，又係睇位落車的機會啦。
萬科(2202) 計劃收購深圳地鐵旗下前海國際，金額達456億元人民幣，計劃以發行A股支付，前海國際主要運營的資產為南山區的樞紐項目及安托山項目，萬科做完呢個交易，深圳地鐵就佔萬科擴大後股本的21%，令深鐵成為萬科單一最大股東。
成件事起因是另一間公司寶能惡意入股萬科，佔萬科24.3%，萬科就變相引入深圳地鐵作股東對抗，被指為用21%股權換深圳兩大塊地。不過萬科這樣做，惹怒了原本持有15.3%萬科股權的華潤，因為深鐵入股後，華潤在萬科的持股攤薄到12.2%。
據萬科董事會宣佈，今次只係以7比3票數通過方案。萬科的第二大股東華潤質疑議案合法性，關鍵是涉及利益衝突而投棄權票的基金黑石，所以代表的一票是否應剔除。有報道指，華潤希望能重新成為萬科大股東，雖然華潤否認向國資委匯報並獲原則上同意，購入寶能系的持股，但最新又有報道指，華潤對「國家隊」於萬科約10%的持股非常有興趣。
香港興業賺錢無息派
摩根士丹利發表研究報告，話萬科股價或因與深圳地鐵交易而受壓。萬科股價逆市下跌，收造17元，挫近3%。萬科早前爆出股權爭奪後，股價一度炒24元，但隨着大手買入股份的寶能減少活動，股價開始回落，至今已由高位回調近三成，可見炒作併購快上快落，切記戒急用忍，有胡就要識食。
香港興業(480) 昨日公佈截至3月底全年業績，純利7.84億元，按年跌13.9%但就唔派末期息，令股東有啲無癮。香港興業上市多年，派息政策不過不失末期息多數有派，中期息就試過停派，去年試過派發同系公司興勝的股份。昨日興業收報3.13元，好接近一年低位3.05元，明顯跑輸其他房地產股。帳面睇，香港興業淨值有12.38元，資產折讓超過七成，未宣佈不派息前息率有4厘樓上，數字頗為吸引，加上本身負債率約為兩成，但有錢賺之下唔派息，似乎管理層係另有諗法。咁大間公司市值只有42億元，單計香港收租物業都唔止值呢個錢。雖然有人猜佢係唔係想私有化，但呢家嘢唔易等，小股東等收息真係俾佢玩死。
陸羽仁
金融High Tea 舊文
來源 source: http://hdfin.stheadline.com
