逐步反映
2016/06/21 08:17:53
網誌分類: 經濟
英國脫歐公投日臨近，留歐及脫歐派兩個陣營昨日恢復拉票工作。上周末公布的多個民調結果都顯示支持英國留在歐盟的再度發力，人數比例重新超過脫歐的支持者。公眾意見在留歐派工黨議員Jo Cox在上周四遇襲身亡後，似乎有所改變。不過，
有不少受訪者表示，Jo Cox之死，對他們支持留歐的態度沒有太大影響，只不過是他們見到公投日臨近，紛紛出來表態而已。
英國脫歐的機會稍緩，近日飽受折磨的全球股市應聲大彈。升浪由亞洲開始，日經指數升2.3%，澳洲股市升1.9%，港股亦升1.7%，係內地股市比較弱，只係微升0.1%。歐洲股市就勁好多啦，平均大彈3.7%！其中英國富時100指數彈升3%；德國DAX指數及法國CAC指數反彈3.5%及3.4%！當中又以銀行股升得最多，整個銀行板塊大升4.5%，包括萊斯銀行、蘇格蘭皇家銀行、柏克萊銀行及渣行銀行等倫敦上市的銀行上升4.8%至7.6%不等。
英鎊匯價亦不遑多讓，兌美元亦由上周四的1.4美元急彈至昨日收市的1.4679美元。而國際油價亦造好，紐約7月期油昨日升2.5%至每桶49.3美元。
歐洲好景，加上油價向上，美股亦會執輸，早段升勢唔錯，但之係升幅逐步收窄，標普500指數朝早一度突破2100點的重要心理關口，但好快又跌返落去，收市升12點，報2083點，升幅0.6%；杜指收市升130點，報17805點，升幅0.7%；納指升37點至4847點，升幅0.8%。
民調顯有越來越多的英國人支持英國留在歐盟，可能真係這班人到最後關頭至表態，另外留歐派近日才開始發力，陸續有《金融時報》和《經濟學人》及《泰晤士報》等英國主流媒體以及IMF等國際組織出來講話，指英國脫歐將會帶來的嚴重後果，令到不少英國人由支持變成反對有關。
大炒家索羅斯也加入留歐一派，在《衛報》上撰文話，有好多支持脫歐的英國人以為，英國脫歐對他們的財富沒有太大影響，其實都係一廂情願的想法。他估計英國一旦脫歐，英鎊匯價會大跌15%至20%，而每個英國家庭的平均收入每年會因此而減少3000至5000英鎊。
索羅斯又指出1992英鎊曾經大跌（他當時便是以沽空英鎊大賺特賺而一舉成名），而匯價大跌又幫助英國經濟復甦。但今次的英鎊大貶值唔會好似對上一次咁對經濟有利。原因有三個，第一係英國利率已經好低，央行已經無空間最減息去刺激經濟；第二係英國有好大的赤字，不大可能會見有資金流入；第三係由於脫歐造成貿易環境不穩定，貶值了的英鎊，對出口亦起不了作用。他提醒英國人要在投票前要知道脫歐的後果，而不是在脫歐之後。他更預言，英國周四公投一旦支持脫歐，周五股市將出現一個「黑色星期五」，其後會出現經濟衰退，對普通人而言，都會係好嚴重的後果。
上星期市場過度擔心脫歐，交易大量傾斜去避險一方，但多個市場大跌，已將脫歐的後果反映在價格之內，那時的風險開始變成留歐出現時的逆轉。
如今英國金融時報指數已從上周四低位反彈5%，若然留歐成事，股市還可走多遠?估計星期五還有一升，但風險慢慢增加，因為市場已逐步反映留歐的好處，所以大家炒留歐，唔好去得太盡。
陸羽仁
回應(0) 我想回應
陸羽仁 BLOG 舊文
來源 source: http://blogcity.me
