滯脹?
2016/07/29 08:49:20
網誌分類: 經濟
油價續跌，能源股偏軟，不過在科技股力撐之下，美股表現不一。標普500指數升0.2%，收2170點；杜指微跌15點，跌幅0.1%，收報18456點；納指升0.3%至5155點。
蘋果公司、亞馬遜及facebook造好，推動納指
升上全年高位，亦撐住大市。Facebook公佈業績，季度盈利超出市場預期的上下限，股價一度升4%，尾市回順，收市升超過1%；亞馬遜及谷歌母公司Alphabets在公佈業績前亦造好，亞馬遜升2%，Alphabets漲0.5%。
Lindy Group首席市場分析師Peter Boockvar表示，Facebook生意好，唔代表美國經濟狀況，汽車銷售商福特（Ford）的生意得唔得，更能反映美國經濟，特別係消費者的肯唔肯花錢買新車，更加值得注意。福特汽車昨日公布的第二季度業績，唔係幾得，盈利差過市場預期，並且表示全年盈利預測有下跌的風險，預期下半年美國汽車銷售會下跌。福特昨日大跌8.2%，係2011年8月8日以來最大單日跌幅。
更值得注意的是杜瓊斯工業指數已經連跌4個交易日，其中以波音飛機表現最差，然後是Caterpillar、油股Chevron及Exxon Mobil。
國際油價下跌繼續令到美股受壓，美國9月期油昨日再跌1.9%至每桶41.14美元，比較全年高位，已經下跌超過20%，更失守了200天線，已跌入了技術性熊市區域。美股近日在高位橫行，無力再上衝，估計係與油價持續下跌，上唔返去45美元，令到市場投資氣氛受挫有關。
目前正有很多句括供應過量及中國策略性原油已經飽和，唔會再買原油，油價已跌到比較關鍵性的價位，市場估計紐約油價這幾天內仍會向下挑戰40美元。失守的話，下一級支持位會係36美元。我仍覺得油價跌係強美元的滯後反映。
美股創新高，與此同時債市亦升上多年以來高位。美國10年國債息昨日跌至1.5078厘，已經係超過5年以來的低位。對於美債債價大升債息大跌，前美聯儲主席格林斯潘昨日接受媒體採訪時表示，債券價格過高，收益率曲線趨平，這種情況下，長期利率不會達到1至2厘之間，係新一輪經濟放緩勢頭的預兆，他擔心美國經濟正處於停滯性通貨膨脹階段。
不過，也有經濟家唔係咁睇，認為美債收益率維持低位並非和美國經濟狀況掛鈎。德銀證券首席國際經濟學家Torsten Slok認為，美國債券收益率處於低位並不是美國經濟不健康狀況的反映，主要是由全球其他地區追求收益率和英國脫歐公投造成的。只要睇最近發佈的美國6月SM非製造業指數56.5，高於預期的53.3，亦高於5月的52.9，創七個月新高，其中就業指數、新訂單指數和商業活動指數全面上升。而6月非農就業資料更係爆標，顯示美國經濟出現加速擴張的跡象。目前的美國經濟狀況，並非格老認為的咁糟糕。
雖然兩種理論也有道理，但債價大升債息大跌，核心是一種避險心態。市場上好多錢，但唔想投資，只想找一些雖然低收益但唔會輸錢的東西泊入去，呢種心態令企業投資低下，令經濟缺乏長線向上的動力。若然如格老所言，美國有停滯膨脹，就係最差情況，經濟唔好，但通脹向上，儲局為控制通脹，被逼加息。
陸羽仁
回應(0) 我想回應
陸羽仁 BLOG 舊文
來源 source: http://blogcity.me
