金手指：紫尿飛揚深港通
■原本深港通消息一出，股市理應開心炒，點知反高潮。 資料圖片
上周，孫柏文講過話同十億身家老炒家通電話。同大家分享佢話中共剷走啲共青勢力後，有好多晾咗喺到、停滯不前嘅嘢都會鬱。點知喺篇文出街都冇廿四小時，連「深港通」都開埋綠燈。原本消息一出，理應開心炒。加埋上
周聯儲局啲會議記錄一齊出，冇理由冇波幅。點知，事隔大約一周，真係冇，好悶，反高潮。
股市悶，唔等於冇嘢炒。見隔離股榮兄喺fb問：「有冇人由2004年騰訊（700）上市一手賣三千七元揸到𠵱家值過百萬？」就令我去搵啲有倍升能力嘅嘢。結果？有。仲要係體驗「深港通」最核心精神，北水南調、炒起港貨。
奧運曲終人散，隨之而來就會係四年一度嘅大陸群星幫建制拉票活動。聽聞，一張「見運動員活動」賣廿蚊嘅門票，現炒到八百人民幣。升四十幾倍。在本土、獨獨聲滿天嘅香港，票價走勢果然眼前一亮。
理由？網民話大陸憤絲想睇孫揚喎，特登要來港，北水南調、炒起港票。首先，它朝你國內有選舉兼反對黨時，就會有呢啲show。不過講真我都想睇嚇孫揚表演，我都差啲撲飛。不過諗深一層，我最想睇佢嗰招「紫尿飛揚」，呢個應該部喺廁所。希望時運高，親眼見。
最後，我6月7日寫咗篇「一注獨沽溫哥華樓」。之後點？樓價見頂即跌兩成。古語話到頂冇人敲鐘叫沽？錯，因有我，孫柏文。
孫柏文
獨立股評人
http://www.fb.com/shuen
本欄逢周二刊出
孫柏文
金手指 - 孫柏文 舊文
來源 source: http://hk.apple.nextmedia.com
