中環在線 - 李華華 2016年8月24日
中環在線：
高比成立8億創投基金
■高比拜恩
里約奧運啱啱完結，港人有番心機工作，太平洋另一邊嘅退役美國NBA籃球傳奇球星高比拜恩就得閒宣佈佢嘅投資大計。
據《華爾街日報》報道，高比拜恩（Kobe Bryant）噚日宣佈成立一家規模約8億港元嘅創投基金，主要投資喺科技、媒體及數據公司。
夥拍投資者Jeff Stibel
喺投資路上，噚日踏入38歲嘅拜恩並不是孤單一個人，因為佢會夥拍投資者Jeff Stibel。佢哋基金公司叫作Bryant Stibel，個名由兩個人嘅姓氏組成，總部喺洛杉磯。
其實兩人早喺2013年已經一齊投資15間企業，直至拜恩由籃球生涯退落嚟，佢哋先決定將兩人合作關係及基金確定。目前，佢哋投資嘅企業包括體育媒體網頁The Players Tribune、法律服務公司LegalZoom、視頻遊戲設計公司Scopely及電話銷售軟件公司RingDNA等等。
兩人接受訪問時表示，佢哋可以互補長短，Stibel有創立公司經驗，拜恩可以貢獻創意及市場行銷。其實新公司嘅標誌係由拜恩設計，靈感來自鋼琴鍵。
Stibel表示，唔希望投資喺淨係想利用拜恩名氣嘅公司，佢哋目標係創造真正價值嘅公司。拜恩就話，佢有判定企業嘅觸覺，成功企業家喺面對任何困難時，都會深信自己及勇往直前。佢又話，比著10年前，自己淨係諗點樣取勝，但𠵱家就希望幫助他人成功。講得咁啱聽，八方祝你一本萬利！
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.apple.nextmedia.com
