中環迷你裙：中環中心花落誰家？
■Samantha相信中環中心最終成為中資的囊中物。 資料圖片
工銀亞洲雖然否認洽購中環中心，Samantha相信此高廈最終成為中資的囊中物，俗語話「唔怕生壞命，最怕改壞名」，中環中心雖然唔係中環的中心（上環地鐵站仲近），不過勝在個名起得
好，樓起得夠高，話曬係維港兩岸其中一個地標，第日買咗喺大廈幕牆度加埋間公司名，幾架勢，做埋宣傳可謂一箭雙鵰。
點解大陸人幾貴都覺得是值的？除了有命名權呢啲表面嘢之外，有位抽Grand Yoho的內地買家已解釋「香港地唔多」，跌極有限，最重要可保值，相較在大陸買樓更安心。話說周一人民幣中間價又狠狠地貶值超過400點子，走錢心切，手上錢很多但能容納到咁大嚿錢的投資的確不多，甲級寫字樓能坐擁長期現金流，對大陸資金有一定吸引力。
家陣唔少大陸人都好愁，為錢尋出路，搞到溫哥華要推辣招遏炒風就知幾誇張。最有錢的買商廈，次一級去溫哥華掃別墅，再下一級不排除是透過深港通掃港股，Samantha嘗試從他們的思維出發：首先，劣市下鍾情實物資產；第二，大平賣，冠君產業信託（2778）絕對是北水瞄準的目標。
環球低息下追逐高息，內地資金也不例外，房地產信託（Reits）具一定吸引力，在深港通可供買賣的股份中，不乏Reits的選擇，冠君產業信託走本港商廈路線，擁花園道三號和朗豪坊包括寫字樓在內的物業，當中花園道三號最新出租率升至95.1%，甲級寫字樓較商場有較高抗逆力，回報較穩定。
點先算平？友人話，大陸最缺少是市賬率低於1倍的股份，用6月底的每股賬面資產淨值計算，市賬率僅0.56倍，簡直是半價大平賣，月初公佈中期業績，半年可分派收入增加15%，若果全年能維持此增長，家陣息率都高達4.7厘。
冠君產業信託吸引還吸引，港股已好幾日出現逾900股下跌的場面，有部份破頂股大幅回吐，賭業績要嚴控注碼。未有貨在手的又想入手冠君的，可擔定櫈仔，等候機會執平貨，深港通還有四個月，唔使急，機會是給有耐性的人。
Samantha
http://fb.com/stocksamantha
本欄逢周三刊出
Samantha
中環迷你裙 - Samantha 舊文
來源 source: http://hk.apple.nextmedia.com
