Money Walker：
外資流入港股 未必好事
■個市仲有冇得炒，最重要唔係睇業績表現，而係要睇聯儲局主席耶倫。 資料圖片
英國脫歐後資金尤其追逐亞洲股市，南亞同北亞都有份，但就一直唔多吼中港股市。呢兩個星期終於見到資金願意炒落後，中港股票基金喺截至8月17日當
周，分別吸資6.1億港元同60.7億元人民幣，係最近一年同五個月以來最多。外資咁遲先肯流入中港，反映大家對中國睇法仲有保留，有得揀唔會揀中港股市先。
不過筆者亦有啲擔心，外資追落後炒中港股，係脫歐後呢輪環球升市開始步入尾聲嘅警號。大行美銀美林亦有類似講法，該行基金經理調查顯示，受訪基金經理旗下投資組合，現金水平佔其整體投資組合比例係5.4%，低於上月嘅5.8%。美銀美林指該比例下月倘跌至5.1%之下，就預示呢波升市完結。
講真，作為散戶又點會知基金經理具體持倉變化，就算有新聞講亦已係滯後數據，所以要睇環球投資情緒，都係參考十年期美債息好過。上述美銀美林基金經理調查發現，有25%受訪基金經理認為，美債息係未來6個月推動股價嘅最大動力。美債息偏低往往會觸發資金轉投股市，以追逐更高回報，所以債息越低就越有利環球股市。
由於主宰十年期美債息嘅係美國加息預期，所以講到尾個市有冇得炒，最重要唔係睇業績表現，而係要睇聯儲局主席耶倫（Janet Yellen）。
El.
http://fb.com/moneywalkerhk
本欄逢周三刊出
El.
Money Walker - El. 舊文
來源 source: http://hk.apple.nextmedia.com
