笑到最後：
恒隆燈神睇好中國
■陳啟宗睇好邊瓣，嗰瓣就會衰，佢可以話係新一代燈神。 資料圖片
發財立金句仿佛係現在中國富人必做行為，有王建林嘅「一億小目標」同馬雲話「唔想做首富」；近日恒隆地產（101）董事長陳啟宗亦一錘定音，佢喺大連商場開幕禮話未來20年至30年，最賺錢的地方一定是
中國。睇番陳生眼光嘅往績真係令人對中國有啲擔心。
陳啟宗話倒數50年，香港房地產係最值得投資，但其實唔使倒數到咁遠，香港地產每10幾年就會發一轉，例如90年代香港樓市紙醉金迷，又例如2003年沙士後多年都係一次機會；即使沙士後市場情緒未定唔敢買，2008年至2009年美國量化寬鬆，又係一次機會。
不過，陳啟宗於1991年接掌家族生意後，翌年即決定帶領恒隆進軍內地二線城市，錯過90年代香港地產發展的黃金時代，亦都令恒隆由一線地產商變成二線。沙士後，陳又話本港地價偏貴，不會吸納地皮，轉去中國買地，本地地產商而言，算係捨易取難。反而近年中資地產反攻香港，中資取代港資，香港地產商一線變二線，即係原先二線嘅地產商又擠到三線。
公道啲講，陳啟宗又唔係成日都錯，例如佢支持梁振英做特首，撇開政治理由，係貼中咗。之後陳仲乘勝狙擊財政司司長曾俊華，幾年嚟間中批評曾俊華。結果曾俊華民望一路上升，最近又同習近平再度握手。
至於中國未來10年係咪最易賺錢？可能係，但一定唔係外資。純粹睇習近平上台後嘅市場炒作原因已知乜事，主流係炒國企合併，中車（1766）已經係個好例子。即係想一個行業有一間獨大，方便出外同人爭合同，但係國內變咗冇競爭，分分鐘有政治任務時國內生意要補貼國外合同。辛辛苦苦搞完重組，亦唔見得想喺嗰個行業開放外資競爭，即使易賺都唔見得係香港呢啲外資有份賺。中國未來數十年最易賺錢，純粹睇往績，只可以當明燈訊號倒番轉咁睇。
高明
http://www.fb.com/bigricetea
本欄逢周一刊出
高明
笑到最後 - 高明 舊文
來源 source: http://hk.apple.nextmedia.com
