中環在線：周樹堂爆富商愛吸沉香煙
周大福珠寶創辦人周至元嘅二仔周樹堂
今年已經76歲，向來低調，近期為新店「香津沉香」做推廣而經常見報。
沉香木屬於白香木，樹心部份受傷或有真菌感染，就會分泌帶有香味嘅樹脂療傷，等40、50年至上百年就成為優質沉香，可以做擺設、首飾，或直接燒熏（燒咗就冇）。
周樹堂由細到大被沉香包圍，兒時陪媽媽燒沉香念經拜神，家中不乏沉香擺設。周樹堂喺尖沙嘴嘅辦公室亦放滿沉香擺設，一室幽香。
淘寶貨一燒有膠味
佢賣嘅沉香首飾由幾百蚊至10萬蚊以上不等，價錢不同，香味嘅濃鬱程度當然有分別。佢主要向越南、馬來西亞嘅收藏家入貨，每次都用一個好捨得嘅方法驗貨，就係拆開一粒沉香珠子，切開佢燒一燒，有香味就係真貨。佢仲試過貪得意上淘寶買嚟500蚊人仔嘅沉香首飾，一燒有膠味，經不起考驗。
佢話燒沉香有寧神作用，話有一位台灣富商甚至將沉香切絲，混入煙絲自製香煙，認為有延年益壽之效。真係信不信由你，肯定嘅係，呢位富商一年燒好多錢囉！
近年內地人開始熱捧沉香，周樹堂話，有次喺內地見到一名後生仔，戴住幾條顯眼嘅沉香手鏈，以佢目測推斷，起碼值100萬元，土豪味十足。沉香如此值錢，難怪曾有人在港偷伐沉香樹喇。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.apple.nextmedia.com
