經濟客艙：狂人VS振英政治學
■只要有「振英政治學」存在，香港的問題，包括房策問題將陸續有來。 資料圖片
政客運用語言偽術經常有，但喺社交網絡時代下，政客圓謊為咗政治圖謀，指鹿為馬成新常態，相比央行吹大嘅資產泡沫面臨爆破更可怕。《經濟學人》專題報道「後真相政治」（
post-political truth），被fb同討論區籠罩住我哋嘅生活，追post時間多過睇新聞，假消息喺網絡share速度快過新聞，大家對追尋真相要求唔同咗，啱聽先最緊要。美國有「狂人」特朗普為人辦，香港也有「振英政治學」。
一位貴為香港特區之首，另外一位為美國總統候選人，兩人最擅長圓謊，從中獲取政治利益。除隱瞞真相，佢哋仲有更高層次目的，就係鞏固偏見換支持。如果有反對意見出現，即樹立敵我陣營，偏見好難被推翻。有非黨派機構調查發現特朗普超過九成言論係假，但支持度近月有增無減。民調顯示共和黨過去一個月內，勝出機會率由兩成升到四成。
啱啱被爆出「橫洲黑幕」嘅梁特首，折射出香港都有份玩「後真相政治」政治遊戲。大家討論邊個講真話、邊個講大話，發展政策討論淪為配菜，點樣叫大家「信」政府。只要有「振英政治學」存在，香港房政策問題陸續有來。本地樓價仍升都係政府過往高樓價政策創造嘅表面風光，實際經濟暗湧淹至。香港人嘅工資永遠追唔到樓價，地產商又推高成數按揭，供樓去到盡，零售業又未見起色，講講嚇美國開會傾加息又嚟到。無論係9月抑或是12月先加息，香港樓市續升嘅好夢可能係時候要醒了。
Captain Cool
https://www.facebook.com/seeforcaptain/
本欄逢周一刊出
Captain Cool
經濟客艙 - Captain Cool 舊文
來源 source: http://hk.apple.nextmedia.com
