中環在線：劉業強踩入假髮界
■專做假髮嘅訓修實業請咗劉業強做獨立非執董。 資料圖片
近排忙住喺橫洲事件撐鄉紳嘅鄉議局主席劉業強，原來悄悄地殺入財金界，話說早前有間專做假髮嘅公司預備上市，請咗劉業強做獨立非執董，其中一個重要職責竟然係解決衝突？
間假髮公司名叫做訓修實業，生產假髮、假
髮配件、駁髮用嘅真頭髮同埋萬聖節道具等等，招股文件中聲稱喺全球假髮界排名第五，今年頭6個月稅前盈利都有成3,650萬元，賣假髮都賺咁多錢，真係估你唔到。
職責係解決衝突
不過，華華睇嚟睇去，都唔覺間公司會有乜特別明顯嘅衝突，要特登邀請劉業強做非執董去解決，平時招股文件亦都好少咁寫，唔通係因為啲假髮蹺實曬咁大衝突？咁真係好難解決。
華華估計，由於獨立非執董喺公司管理層同公司出現利益衝突時有責任提供獨立意見，唔知經常射住新界人嘅劉業強，能唔能夠喺股東同管理層之間拎到個平衡？除咗呢個職責外，劉業強仲會就業務及營運提供策略建議同指引。
話說回來，招股文件話劉業強係永同益集團嘅副主席同埋富徹國際主席，一間做地產，一間做農業業務嘅。唔講唔知，劉業強原來係倫敦政治經濟學院（LSE）統計學理學士畢業，之後就冇再進修，可能忙住解決衝突。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.apple.nextmedia.com
