Money Walker：
「You’re fired」唔易講
■聯儲局獨立於白宮，特朗普想炒耶倫，並唔係一句「you're fired」咁簡單。 資料圖片
美國大選距今僅一個月，唔使問都知大選形勢未來幾周對金融市場表現極關鍵，尤其是特朗普嘅經濟政策本身充
滿矛盾，實質影響難以預測，佢入主白宮所帶來嘅不確定性，肯定唔少得過英國脫歐。
首先，特朗普屬意弱美元，但矛盾在佢同時又支持一啲有機會推動美元走強嘅政策，例如唔贊成美國加入自由貿易協議、鼓勵產業回流美國，兼擬提供稅務優惠吸引企業將海外利潤滙返美國等。上述舉措將間接改善美國貿易逆差，繼而推動美元走強，抵觸特朗普嘅弱美元主張。
不過亦有人唔係咁諗。分析指特朗普倘執政，只會玩謝美國經濟，鑑於一國貨幣購買力長遠亦反映緊該國生產力，隨住美國生產力喺特朗普嘅施政下日漸磨蝕，美元即使短期可能走強，中長期貶值壓力絕對不輕。
特朗普嘅騎呢嘢又點止咁少，佢仲批評過聯儲局主席耶倫，話對方因為政治原因而保持低息，此舉正為股市製造問題，一旦加息，有關問題就會顯現。但另一方面，特朗普又話自己其實都係支持低息，咁即係點？筆者估特朗普唔係唔鍾意低息，只係唔鍾意耶倫啫。
特朗普講到明當選就會換走耶倫，眾所周知聯儲局獨立於白宮，主席一職唔係話換就可以換，特朗普句金句「you"re fired」唔係話講就講，總統亦冇權要求聯儲局主席agree with her boss。但特朗普到時如果三日唔埋兩日就批評耶倫，市場擔心任期2018年就屆滿嘅耶倫未必願意續任。美國總統有權委任聯儲局主席人選，所以如果耶倫真係唔願留低，特朗普就可以透過呢個途徑間接影響貨幣政策，到時美國息口點走真係冇人估到。
El.
http://fb.com/moneywalkerhk
本欄逢周三刊出
El.
Money Walker - El. 舊文
來源 source: http://hk.apple.nextmedia.com
