中環在線：梁錦松孖JM未婚夫搞創投
■梁錦松（左）同吳啟楠（右）識咗10年。
特首選戰前，南豐行政總裁梁錦松老是常出現。佢噚日就出席旗下創投公司New Frontier記者會，身邊仲有位型男。原來呢位型男叫做吳啟楠（Carl），除咗係創投公司聯合創始人兼首席執行官，仲係𡃁模始祖Ja
nice Man未婚夫呀。
Carl畢業於倫敦政治經濟學院，主修經濟系，曾經喺瑞銀倫敦總部工作，其後加入黑石集團，離任前係董事總經理。佢話約10年前加入黑石，當年已經係梁錦松同事，雙方開始熟落，家陣仲一齊搞創投公司㖭。
估唔到做開地產嘅南豐，近年開始投資初創企業，南豐係股東之外，台灣頂新集團亦有份投資New Frontier。公司目前主要物色具增長潛力嘅初創企業注資，已投資1億人仔落4間公司。
問到有乜條件先會被揀中，梁錦松話「最緊要睇性格係咪有熱情」。佢指唔少初創企業創辦人唔夠堅毅，好易失敗告終。佢話雖然有創意唔代表成功，但係只要係社會上缺乏嘅嘢就有發展機會。對創業者而言，資金唔係最大問題，最怕係唔夠硬淨捱唔過難關。咁唔知梁錦松又有冇熱情、夠唔夠硬淨去問鼎特首一職呢？
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.apple.nextmedia.com
