財金冒險號：
上市公司飯局奇聞
■嗰位富二代CEO竟然喺投資者飯局上玩手機。 資料圖片
近日出席一間大陸民企的投資者飯局，有幸坐喺CEO附近。呢位CEO只得廿幾歲，無幾耐前從爸爸主席兼公司創辦人手上接棒。年紀輕輕做CEO唔係唔得，facebook、Snapchat CEO上任時都
係廿歲出頭，但人地本身係公司創辦人，白手興家，同富二代接棒係兩回事。
席間，公司管理層例牌介紹業務與近期發展，但主角係年紀做得CEO阿爸嘅CFO。咁都唔出奇，廿幾歲經驗尚淺，未必習慣同投資者溝通，由資深CFO講解效果更佳。CFO講講嚇，驚人嘅事發生了：富二代CEO玩手機，係真．「玩」手機，玩緊某隻國產手機遊戲。呢啲飯局，幾乎每人間中都會撳嚇手機，但只限於睇睇whatsapp、撳嚇股價，最多離席講幾分鐘電話，但玩手遊喎，仲要係主人家CEO，小生見所未見，大開眼界。唯一抵讚嘅係佢冇開大喇叭嘈住曬。
或者有人覺得：上市公司最緊要做好盤生意，見投資者只係門面嘢；門面嘢做得好，固然未必係好公司，但連門面嘢都懶得做，完全唔尊重投資者，就肯定管理有問題，就算年輕CEO只係掛名，老爸仍大權在握，營運未必有問題，但已反映企業管治差勁。大陸民企質素本已參差，散戶難有機會近距離觀察管理層，如果見到如此年輕嘅富二代接棒，就要份外小心。
笑笑生
mailto:sneeringman@gmail.com
本欄逢周四刊出
笑笑生
財金冒險號 - 笑笑生 舊文
來源 source: http://hk.apple.nextmedia.com
