中環在線：
施永青交棒 話富二代保守
■施永青有一對寶貝仔女喺中原幫手，開心曬。
中原集團主席施永青噚日出席公司活動後，被問到點睇𠵱家中資狂掃本港地皮，佢竟然唔怕得罪人咁話，香港發展商唔夠砌，「香港發展商，老老實實係第二代、第三代，人哋（內地）係第一代，第一代係搏殺型，一無所有，
輸曬算數。香港富二代要守業，又要向老竇交代，所以唔博。一個博，一個唔博，邊個贏？梗係博嗰個贏。」
二女睇數 大仔搞IT
雖然佢口講第二代冇咁掂，咁唔通唔交棒咩，佢自己咪一樣安排一對仔女入中原幫手。
佢二女施慧勤舊年結婚，放咗成年假，3個月前已經回歸。施老闆呢個女好叻喎，2008年英國劍橋經濟系畢業後，去過外資行打工，加入中原都做過幾個部門，又喺內地做過，家陣坐個位唔少嘢㗎，掛名係內部審計委員會董事，即係做乜？佢就話集團有好多子公司，要幫手睇住，即係睇數喇。
施老闆長子施俊嶸就繼續搞IT，佢早前由子公司利嘉閣跳番去中原，最近幫公司穿針引線搞咗個「視頻搵樓」，搵旗下4,500名代理入單位拍完片，自編自導自演介紹單位，計劃運作咗一個月，至今上咗3,300條片，算係有功課畀施老闆睇。講到有乜新搞作，佢就話，諗住將內地睇盤機系統引入香港，希望同事啲盤新、快、齊。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.apple.nextmedia.com
