華爾街咁都贏！
2016/11/10 09:28:09
網誌分類: 經濟
美國大選結果，令全世界傳統精英跌曬眼鏡，特朗普以279對228張選舉人票，壓倒性擊敗希拉莉，成為第45屆美國總統。不但止總統是共和黨人，連國會的參眾兩院，都由共和黨人佔了過半數席位，共和黨全面控制總統寶座和國會。
大選結果於週三香港時間下午3時公布，但美股在朝早特朗普得票超過希拉莉時已開始暴跌，杜指期貨在一度勁插800點。正當投資者驚到有得震無得瞓之際，隨著選情明朗化，市場已開始冷靜下來，在下午12點半渡過低點，全球股市跌逐步收窄，美元對日元逐漸回升，墨西哥比索跌幅也大幅減小。
到下午4點半左右，美指期貨已經收復了日內一半跌幅，美國10年期國債已經全部喪失日內漲幅，轉為下跌。上次英國公投退歐，美股經過一星期左右，才收回過半跌幅。這次，從開始下跌至收復過半跌幅，只用了7個小時。
到晚一美股開市，已神奇地無大跌，開始時微跌63點之後一路走上，而且越升越有，臨收市前半小時，勁升300點，收市略為回順，仍升257點，收18590點，升幅1.4%；標普500指數升24點，收報2163點，納指升58點至5251點，升幅都係1.1%。美股昨日升勢全面，可以羅素2000隻中小型企業指數表現更好，升2.5%！而且成交配合，全日交易量達到120億股，係6月英國公投脫歐以來最多！
美股今個星期連升三日，週一、週二可以講係「希拉莉升市」，而週三變成「特朗普升市」，特別係昨日，股市忽然大好，究竟錢從何來呢？主要還是來自債券市場，美國10年期國債息由早上的1.72厘，大幅上升至收市的2.068厘，2年期國債息亦由0.71厘大升至0.91厘，顯示投資者大手沽出債券，將資金調到股市。
要留意美國債息大升，對本地房託股不利，估計佢地會面對沽壓。
而金價則由朝早的1338美元高位，迅速回落至上日的水平1278美元。反映出避險情緒並未因為特朗普意外勝出而提高，反而明顯下降。睇股票恐懼指標VIX指數昨日大跌23%至14.3的9月初以來低位，與由10月初的22.9高位，差天共地。
紐約分析員表示，昨晚大選點票結束之後，有人留言給他，估計週三杜指會大跌800點，VIX指數亦會飆上50！結果完全相反。佢話今年市場對「重大事件」的共識，基本上係全錯，市場普遍預期美國1月2月會出現經濟衰退，結果係錯；英國6月公投脫歐，會引起股市大災難，錯；特朗普不會勝出大選，錯；如果 特朗普勝出，股市會大跌，都係錯！分析員開玩笑話，如果有人問他未來股市會係點，佢真係唔敢估！
特朗普勝出大選，股市不跌反升，一個正路解釋係「不確定性」呢個股市殺手好大程度隨著大過塵埃落地退出市場，加上特朗普當選後講話「正常番」，呼籲美國人團結，令市場冷靜下來。另一個不太正路的解釋，是美國傳統精英下重注賭他們支持的希莉取勝，結果事與願違，唯有頂住個市，以免自己輸大錢。
投資者把注意力集中在特朗普政策帶來的正面影響上面，而忽視了此前對他的勝出可能會引起環球貿易戰爭以及其他順口開河的憂慮。
例如特朗普曾經建議降低企業稅率和一次性的稅務優惠，意味著美國公司可以從海外調回避稅的數以十億計資金。另外，特朗普亦表示會加強城市的基礎建設，Caterpillar既係最大的建築設備企業又在海外擁有好大生意，亦最受惠，股價昨日大漲7.7%，係表現最好的杜指成份股，有相關概念的股票亦顯著上揚，就唔難理解啦！
杜指成份股表現第二及第三好的都是金融股，高盛升5.9%，摩根大通亦漲4.6%。華爾街精英總有藉口炒自己隻股，可以話特朗普大搞基建，又話減稅，會集中火力用財政政策代替貨幣政策又推動經濟，在通脹以及利率回升的預期升溫下，自然對銀行股有利啦。
股市，從來係大戶話事，選唔中佢地心水的總統，一樣可以贏錢。
陸羽仁
回應總數(1) 會員回應 | 非會員回應
0點
回應載入中，請稍候... 
本網站之所有網誌文章及回應內容均屬網友其個人意見，不代表「頭條網」之立場。
陸羽仁 BLOG 舊文
來源 source: http://blogcity.me
