財金冒險號：
新形勢最緊要揸金
■特朗普當選美國總統，投資嚟講一定要揸金。 資料圖片
睇開本欄嘅朋友，應該唔會話特朗普當選係「黑天鵝」，因為小生三番四次估佢贏，包括4月份開欄之作，預言佢當選係今年四大驚奇之一，又喺7月份叫大家準備定佢當選後嘅投資策略。塵埃落定，好多人話呢個係美
國版「脫歐」。咁豈不是又一低吸機會？係，正如小生7月時話，「等特朗普變成所謂『黑天鵝』至出手執平貨」，但今次炒法唔同，期望唔好咁高。
英國公投脫歐後，炒環球央行放水、資金來亞洲避險，結果恒指兩個半月大升4,700點。今次唔同，一來港股唔似6月底咁殘，二來脫歐係遠慮，或拖到2018年底至脫得成，但特朗普明年1月就上台，政策好快就變。至於炒放水，聯儲局已放曬風12月加息，雖然若股市大插，可能又要睇定啲，加息再次「狼來了」，確可成為大市反彈藉口，但升幅肯定不及7、8月。睇長遠啲，聯儲局會否調頭減息，甚至出QE4？無人知，特朗普嘅貨幣政策立場搖擺不定。
股票要打遊擊炒波幅，金就一定要揸。特朗普係本土派，似乎唔想美國再做世界警察，亞洲冇咗大佬睇場，輕則擦鎗走火，重則開戰。
題外話：偏左嘅民主黨知識份子希拉莉被指立場保守、同ISIS有路；偏右嘅共和黨富豪特朗普反建制、求變，十足《笑傲江湖》華山派「氣宗的徒兒劍法高，劍宗的師叔內力強，這到底怎麼搞的？」
笑笑生
mailto:sneeringman@gmail.com
本欄逢周四刊出
笑笑生
財金冒險號 - 笑笑生 舊文
來源 source: http://hk.apple.nextmedia.com
