操盤手劄記：通車名單早已曝光
■市場盛傳深港通下周一開通，有望成為港股催化劑。 資料圖片
特朗普明年1月20日就坐正做美國總統，Trumponomics係咪幫到失落於全球化嘅美國人呢？據CNN攞到由特朗普團隊草擬嘅備忘錄，執政頭200日嘅大計圍繞五大原則，包括重新談判或退出《北
美自由貿易協定》（NAFTA）、叫停《跨太平洋戰略經濟夥伴關係協定》（TPP）、叫停不公平入口、叫停不公平貿易慣例，以及追求雙邊貿易合作。
特朗普贏出之後，已擺出不惜一切刺激經濟嘅姿態，大幅減稅、大搞基建，懶理財赤及通脹。喺通脹預期帶動下，美國債息急升，引發大量套息交易資金流出新興市場，造成美股上升而新興市場下跌。道指已連升七日，兼連續第四日創收市新高。
美元持續強勢，美滙指數高踞100之上，相對人民幣則越跌越有。人民幣兌一美元中間價連跌九日至6.8592，為八年來最弱，九日累跌1,101點子或1.6%。在岸價（CNY）跌破6.87，離岸價（CNH）更破6.88，低見6.8811，創紀錄新低，反映走資情況相當嚴重。人民幣貶值不利港股，因會影響海外投資者買入中資股意欲。
港股受累走資及環球資金重新調配，反彈乏力。昨隨外圍高開後，尾市升幅收窄，競價時段更倒跌，收22280，跌43點，後市有回落風險。恒指牛證重貨區喺21900至21999，大戶或先質低大市殺牛。不過，市場盛傳深港通下周一開通，有望成為港股催化劑。執筆之時官方仍未有公佈，但入圍名單其實早已曝光。據講，由於入圍嘅中小型股以恒生綜合中小型股指數為基礎，所以計算50億元市值嘅門檻，亦會參照恒指公司統計嘅12個月平均市值，唔會另行計算。中小型股指數半年檢討一次，換言之，8月中第二季季檢時嘅市值就係定案！
仲唔即刻上網睇嚇，新入圍嘅中小型股有成95隻！我就睇緊「男裝股」利郎（1234），此股上市以來，年年都派中期息、末期息、特別息，現價4.55元，市盈率7.75倍，股息率9.23厘，幾吸引。睇走勢圖，更呈現區域突破利好訊號，可以諗諗。
割柑人
本欄逢周四刊出
割柑人
操盤手札記 - 割柑人 舊文
來源 source: http://hk.apple.nextmedia.com
