中環在線：
八卦公周顯爭做金融界選委
■周顯
特首選委會選戰即將開鑼，唔少人磨拳擦掌，希望成為1,200名選委其中一員，有票就有say咁話。金融服務界選委有18席，除一班證券行老闆，新近聽聞自稱為「財經八卦公」嘅周顯都想去馬，靚佬股評人鄧聲興亦想再接再厲。
周顯係財經專欄作家，專門
寫細價股，今屆參選立法會金融服務界議席但落敗嘅詹劍崙（Ricky），競選時同周顯嘅輿論攻勢夾到天衣無縫，中環早已盛傳，Ricky會披甲再戰選委會。
正當大家以為周顯再做佢軍師，點知金融服務界立法會議員張華峰噚日爆料，話周顯都想選選委，反而平時會協調名單出選嘅10個金融業界組織，就未夾好。華華問過周顯，佢話的確有朋友建議佢參選，佢正在摸底中，度緊係咪夠票。
鄧聲興等開會協調
金融服務界嘅選委戰向來以證券行老闆佔優，好似藺常念與鄧聲興兩位財演，上屆勇敢參選，雙雙落敗。藺sir噚日斬釘截鐵話唔再選，以免重蹈覆轍，分薄票源，佢希望鄧聲興可以選到。佢仲笑住形容自己近期高調支持民主係票房毒藥，無謂選喇。鄧聲興就話，要等股票分析師協會周三開會協調，再決定邊個出選。
上屆金融服務界選委戰，當選者約有120至230票，鄧聲興同藺sir各有100票，若兩財演協調一人出選，未必冇機會。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.apple.nextmedia.com
