香港無得獨食
2016年11月01日
內地禁止內地居民來港「碌銀聯卡」買保險，對港股氣氛有影響，恒指連跌第五日，最後微跌22點，已經算跌得少啦。個市昨日低開，陸羽仁認為跌得唔算多，皆因上星期收市後，傳出中央限制內地消費者碌銀聯卡買保險的消息，呢個消息令保險股受壓。
好彩的是本地純
保險股唔係咁多，相對沖擊唔係咁強，但呢樣嘢嘅影響就不宜低估。中環茶友中有樓神老死，佢見到呢個消息，直言呢排內地水嚟香港點止買保險，仲有買樓，估計O依家新盤至少有三成以上係被內地資金買左。若然係內地控制資金南下，咁樓市都有可能降溫喎。
限銀聯碌保險有啟示
茶友話，內地O依家水頭充足，但大家關心人仔會唔會繼續下跌，好多錢想落嚟香港買嘢保值，但結果令到人仔匯價腳軟。本來，人民幣兌美元匯價下跌，對中國出口有幫助，尤其英鎊、歐羅等貨幣猛插，人仔跟跌啲可以減少中國承受的壓力，但如果貶值太快，造成外匯流失明顯，影響市場對人仔的信心，呢個就係中央唔想見到的事情，所以如果資金南下太過惹眼，北京就會做嘢。
從大勢嚟講，中央係想人民幣走出去，亦唔介意人仔跌啲，但最緊要係有序，唔好恐慌，所以可以見到第四季人仔匯價受壓，內地透過港股通南下的錢已經少左。呢排話好多錢碌銀聯卡買保險，北京查查數真係咁喎，咪出招降溫囉。
同一個邏輯，呢排好多人話內地有錢來港掃樓，講得多自然就會引起北大人關注，所以呢排就算新盤賣得好，地產股都上唔番高位，好可能就係擔心好景唔知撐到幾耐。同一道理，雖然有人唱澳門賭收好似見底，但如果博彩業勁彈，一樣會引起中央出手。講到底，中港O依家密不可分，香港要好，就要中國好，如果中國唔好，香港想獨食，北京唔會唔做嘢，所以銀聯卡呢單嘢，只係大氣候下的小現象，其他相關現象仲會一齊來。
由於內地叫停銀聯卡碌保險，友邦(1299) 成為跌市主因，一隻股就拖低大市91點，收挫4.8%，造48.95元，為全日跌幅最大藍籌股，估計短期都要唞唞；保誠(2378) 挫2.8%造128.3元；宏利金融(945) 降0.6%造112.2元。喺咁情況下，大市能夠短暫止跌回升，最多升91點，已經有小小令人意外，最後尾市升勢不保，恒指收報22934點，下跌20點；國企指數收報9559點，上升44點，成交金額619億元。
長實大刁好事近
長實地產(1113) 傳出以357億元售中環中心予中資機構嘅大刁已差唔多搞掂，消息令股價造好，升逾3%造57.45元，為升幅最大藍籌；長和(001) 升0.9%造95.95元。據英國《星期日泰晤士報》報道，將於下周一公佈季績的滙控(005) 正與英倫銀行就可能出售交行股權作出商討，以釋放超過50億英鎊(約472.5億港元)的資本。雖然大市下跌，但滙控股價喺消息下就企硬58.35元無變。
金價回升至1270美元之上，一眾金礦股造好，招金(1818) 首三季多賺17%，股價升3.98%造7.84元；中國黃金國際(2099) 升1.67%造19.5元； SPDR金ETF(2840) 升0.64%造944元，係少數表現較佳板塊。新股江南布衣(3306) 首掛，開市報6.55元，比上市價6.4元高2.3%，收造6.87元，升7.3%，成交5847萬元，喺咁市況已經算佢叻啦。
陸羽仁
金融High Tea 舊文
來源 source: http://hdfin.stheadline.com
