中環在線：吳佩慈因範範入股怡益
台灣女星吳佩慈上星期忽然入股怡益控股（1372），持股兩成，成為第二股東，中環人不禁嘖嘖稱奇，估唔到佢除咗幫富商男友紀曉波生仔，對投資上市公司都有興趣。
聽講吳佩慈之所以入股怡益，係因為怡益早前同重慶比速汽車達成合作協議，比速本月初搵嚟台灣藝人範瑋琪（範範）幫手宣傳新車。大家都知道，範範同吳佩慈、小S等女星係老友記，吳佩慈因此睇好比速，於是就投資香港上市嘅怡益控股。
吳佩慈對於香港股票市場應該唔會太陌生，事關佢嘅富商男友紀曉波都係股壇中人。根據聯交所資料，紀曉波係博華太平洋（1076）主要股東，博華近年去到塞班島發展賭業。吳佩慈既然因為好姊妹嘅關係而睇好比速嘅汽車生意，自然會走去問紀曉波畀意見喇，或者紀曉波聽完都覺得正，咪好大方咁用吳佩慈名義入股囉。
其實女藝人入股香港上市公司早有前科，最出名係趙薇，佢前年同富商老公黃有龍以31億元入股阿里影業（1060），之後減持部份股權獲利近6億元；舊年底佢又入股創業板新股中國創意（8368）。
吳佩慈入股呢隻怡益，相對未有太多股民留意，公司市值15億元，佢有冇投資運呢，真係要拭目以待嘞。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.apple.nextmedia.com
