中環在線：
沈大師講窩輪曬青姐玉照
股評人胡孟青（青姐）認真多朋友，每逢佢啲行家開talk show，總會預個環節畀佢。好似上星期六沈振盈（沈大師）同羅尚沛一齊開騷，其中一
部份沈大師扮講一隻窩輪嘅走勢，竟然用咗多張青姐嘅相做背景，由又靚又索去到面青、冇曬時間值都有，沈大師認真鬼馬。
事隔3年，沈大師同羅尚沛再喺九展舉行「串到盡」talk show，呢類股評人talk show多數係棟篤笑加投資講座混合體。兩人劈頭攞立法會主席梁君彥開玩笑，羅尚沛話沈大師個樣似梁君彥，沈大師聽到都冇乜所謂，反而笑梁君彥最近俾一隻股搞到頭都大曬，呢隻股咪就係「中國糧（梁）油（遊）」囉。
全場高潮肯定係沈大師用青姐靚相去講窩輪，佢扮講一隻冧巴係41689嘅友邦窩輪，最初隻輪冇人識，輪價低，呢個時候螢幕出現青姐後生時嘅青澀相；之後隻輪跟隨正股上升，就到青姐靚相出場；可惜所有窩輪都有到期日，沈大師唔知喺邊度搵到幾張青姐嘅肉酸相做背景。
沈大師事後話，佢同青姐好friend，唔怕對方嬲嬲豬，至於青姐有冇喺現場睇show，佢就唔知道喇。佢話青姐每次去睇行家嘅talk show都包到實，化身忍者小靈精，常人見佢唔到㗎。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.apple.nextmedia.com
