金手指：人民幣可以繼續沽
■現在有很多跡象顯示人民幣仲未跌夠，可以繼續沽嚇先。 資料圖片
人民幣跌，孫柏文都有拋空，仲要拋空咗好耐。咁唔同股票，拋空貨幣一定要借貨番來，所以一定有孖展成份，仲要拋空可輸嘅係無限，所以一定會日日睇嚇要唔要平我嗰啲沽人民幣倉。
如果大家同我一樣。我快答，
唔使。點解？實在有太多跡象顯示人民幣未跌夠。論跡象，首先當然係本報B1頭條，話大陸進一步收緊，大陸人來港碌卡開保單。如果人民幣已跌到底，已跌盡，佢哋根本唔使出呢招。如人民幣已見底，大陸要防嘅係我哋啲香港人幾萬幾萬咁運番大陸買佢哋啲投資產品。
以上，都只係打大陸人民幣資金池水外流。佢哋當然亦有減少大陸人民幣資金池水量。如果唔係，搞到冇水，上海銀行同業拆息會咁升法？而更緊要係大陸國債拍賣都認購不足，市場同政府話以現貨幣供應量，利息要高好多。唔肯加息，錢就流走，滙率就要跌。
跟住當然係中資再用天價喺香港買地。如用港幣計，到起好，根本蝕硬，不過醉翁之意不在地，而係想搵個「停錢場」。借人民幣，換今日港元買地，起好，跟住將他朝嘅港幣收益換做第時嘅人民幣，有賺。不過我都認，好扭曲。
以上，都係呢幾日零零星星，睇落好似冇乜關係嘅新聞。不過全部矛頭，直指人民幣兌美元滙率繼續下跌。最後，隔籬曾淵滄博士話人民幣對其他貨幣冇跌。呢個對上幾個月係事實，不過如果冇咁多外滙管制，你估人民幣對其他貨幣會升、跌、定係唔鬱？你個倉冇沽番兩手人民幣，真係對唔住自己。
孫柏文
獨立股評人
http://www.fb.com/shuen
本欄逢周二刊出
孫柏文
金手指 - 孫柏文 舊文
來源 source: http://hk.apple.nextmedia.com
