高估值高風險
2016年12月20日
港股開市又跌，成交唔係咁多，反映沽售壓力唔算強，主要係買意欠奉。喺弱市之中，兩隻早前好受追捧嘅大股騰訊(700) 同港交所(388) 再跌，搞到撈底嘅散戶都有啲無癮。
貴價大股紛腳軟
兩隻強勢股喺呢排有啲轉向，騰訊自從特朗普勝算後，股價開始乏力。呢樣嘢同美國納
指跑輸大市有啲相似，特朗普好明顯係舊經濟人，重視基建、銀行，傳統能源行業，對於新經濟同環保興趣唔係咁大，喺咁環境下市場對喺過去十年大旺嘅新經濟股多咗疑慮。
睇番新經濟發展離唔開政府支持，好似O依家好流行講嘅綠色債券，變相係鼓勵金融機構協助環保企業融資，或者要求商界增加環保元素。O依家雖然係自願性，但市場估計慢慢就會變成強制性，喺咁情況下企業自然會大力朝呢個方向發展，但如果政府唔支持，企業就會覺得搞呢啲嘢只會增加支出，無乜利益。舉一反三，咁亦解釋咗點解特朗普上台後，新經濟股會弱咗。
香港唔係新經濟龍頭，上市嘅巨型科企來自內地，佢哋股價多數跟住美國走，美國呢類股份唔掂，佢哋都受壓。好似昨日騰訊插咗落182.2元，再跌1.7元，特朗普當選後佢插落190元我叫大家咪撈，跌到O依家同高位220.8元，差唔多跌咗40元，幅度都幾甘吓，要小心係美股O依家企喺高位，若然美股插落嚟，呢啲高估值嘅股票仲有下跌空間(騰訊現價50倍市盈率)。同騰訊比較，同屬高估值嘅港交所昨日仲跌得多啲，佢收報182.6元，跌1.35%。(港交所現價27.3倍市盈率)
美國加息後，本地拆息高咗，港股難免受壓，大市終於跌穿22000點，恒指收市報21832點，跌188點，為自今年8月4日以來的收市低位；國企指數收報9377點，跌92點，成交只有558億元。雖然個市沽壓唔大，但都擔心喺無資金入市下，佢陰陰吓會再插低啲。
大市缺水要防陰跌
香港無乜水，主要係美元強，北京不敢掉以輕心，繼續嚴防走資。彭博就報道內地居民在香港碌Visa及Master卡購買保險受到限制，只能購買不多於5000美元的保單，內地居民亦不能多次刷卡繳交保費，意味不能再分開多次碌卡以投保大額保單走資。
報道引述保誠保險在本月17日內部通知經紀，在當日下午1時30分，正式限制使用Visa及Master卡購買多於5000美元的保單，有保險經紀透露，最受內地人歡迎的儲蓄壽險保費遠高於5000美元，現時他們要投保都轉用現金及香港戶口繳費。Master卡發言人拒絕評論事件。保險股基本上跟隨大市回落，友邦(1299) 跌1.24%，報43.85元；宏利(945) 下滑1.52%，報142.4元，內險股亦都大致向下。
另外，中國國家統計局公佈11月份15個一線及二線城市房產市場迅速降溫，內房股普遍受壓，其中終止與深圳地鐵資產重組的萬科(2202) 更加大跌3.2%。萬科收購深圳地鐵資產的交易由於缺乏主要股東祝福，基本上已預咗好難成事。
萬科搶購似落幕
萬科股價下插另一個原因，係內地傳媒引述消息人士指，萬科股東寶能有意出售所持有的萬科A股，正在尋找買家，不排除寶能直接把股份賣給管理層盟友的可能性。上述消息雖然沒有得到寶能方面的證實，但由於中證監之前公開表達不滿險資做槓桿收購，萬科股權爭奪都好可能係觸發點之一，所以萬科搶購戰可能在管理層干預下，已經落幕。
市場好敏感，萬科股價早排已經搶高咗，一聽到無咗收購戰甚至有大戶沽貨，隻股就好食咗瀉藥咁。
中央經濟工作會議話「樓不是用來炒的」，令一眾內房股加深下跌，中國海外(688) 亦跌1.4%至20.65元。有讀者問中國海外主席郝建民上個月突然落莊，市場嘩然，公司無後續問題咩？
我話即使郝有事，博佢係「鐵的公司流水的官」，對公司影響有限，而且隻股近排跌咗好多，跌到一年低位，佢現價5.7倍市盈率，派3厘息，即使再跌，長揸都有一定防守性。
陸羽仁
金融High Tea 舊文
來源 source: http://hdfin.stheadline.com
