魚樂無窮：粉飾櫥窗變陰乾
■市況差，只能說句希望在明天啦！ 資料圖片
人生不如意事十常八九，當今政壇最能反映，現屆特首盡心盡力為中央服務，只求做多五年，點知一樣被DQ，認真慘慘豬；已遞信嘅財爺，以民望計接任乃十拿九穩，卻遲遲未得到祝福，等到頸都長；想贏番香港那個，未入閘已遭瘋狂惡搞
，嘴臉深入民心，輸在起跑線。
股票市場更加難盡如人意，深港通開通後，港交所（388）日日向下炒，足足唔見一成，距離星級分析員金牛價目標又遠咗；以為年底有粉飾櫥窗，點知聯儲局一句明年加息三次，美元越走越強，拖累人民幣跌極都仲有，港股作為資金進出最自由嘅地方，又變成提款機，慢慢陰乾了。講近啲，上星期叫大家留意嘅明輝國際（3828），雖然宣佈派特別息0.2元，照秤股息率有十幾厘，但係依然俾人掟到七彩，人心虛怯，不合預期的東西，好事都會變壞事。
恒指埋單跌188點，跌穿咗舊年底收市價21914點，搞咁耐都係原地踏步，50隻藍籌，上升比例不足四成，有幾難玩大家心中有數。市況差寫嘢都灰啲，惟有講句希望在明天，係咁先！
唐牛
http://www.fb.com/tongcow88
本欄逢周二、四刊出
唐牛
魚樂無窮 - 唐牛 舊文
來源 source: http://hk.apple.nextmedia.com
