智取大市：
由樂視到中國金融危機
■樂視要收番now嘅英超廣告收入分成，其實都係走資嘅一種。 資料圖片
舊年9月，樂視體育以傳聞價逾31億銀，奪得3季英超轉播權，喺全人類計唔通條數之下，實行蝕住錢咁做。樂視體育其後以獨佔now播英超時段廣告收入作為條件，同now共享轉播權，令市場更驚
訝。不妨諗一諗，投英超錢從何來？一係用王健林、馬雲向樂視體育融資嘅人民幣，一係香港透過唔同渠道借番嚟，投英超可分期付款，但透過分享播映權而吞咗now嘅英超廣告收入，呢筆收入就肯肯定係港幣交收！
就算投英超筆錢係喺香港借番嚟，他朝對家要樂視還錢，樂視以大債仔惡曬嘅態度，大可留一句「你喺大陸收錢，我畀人仔你，唔收就罷！」唔理樂視目的係乜都好，透過上述交易，最後都能夠收到走資之效。對賈躍亭嚟講，除笨有精。呢一種現象，影射內地唔少人覺得錢留喺內地，係袋唔穩嘅錢；錢嚟到香港，就係袋得穩嘅錢。佢哋不惜用好多人民幣，去換有限嘅港幣。
呢件事再反映兩個可能性，第一，走資某程度上係內地政局演變出嚟，為勢所逼；第二，人民幣供應其實遠多於人行公佈數字，令大家不惜賤賣人仔。走資之下，股市不跌反升，係嘅，市場總有短視嘅時間，毋須驚訝，但長遠嚟講，絕對係內地金融體系一場潛在危機。
晉佳
http://www.fb.com/advanceguy1
本欄逢周一、三、五刊出
晉佳
智取大市 - 晉佳 舊文
來源 source: http://hk.apple.nextmedia.com
