中環在線：郭炳江跑樓梯贏餐飯
第5屆新地公益垂直跑噚日舉行，今年7月獲准保釋嘅新地（016）前聯席主席郭炳江再度落場，同阿仔郭基煇一齊跑上ICC100樓，仲贏咗阿仔一餐飯㖭呀。
染番黑
髮嘅郭炳江相當精神，以27分54秒跑完2,120級樓梯，破咗兩年前嘅紀綠；郭基煇成日踩單車夠曬弗，以23分鐘跑完。不過佢都係輸俾爸爸，事關賽前阿爸同佢打賭兩人成績相差少過5分鐘，結果估中，阿爸仲叫佢咪走數呀。輸餐飯嘅郭基煇大讚爸爸弗咗，又話今年一齊跑好感觸。睇番噚日個人賽男子總冠軍以14分34秒完成，65歲嘅郭炳江唔使半粒鐘跑完，都算係咁喇。
講到最新動向，郭炳江強調家陣唔理公事，認為年輕人有年輕人嘅世界，只係「作為阿哥，就同細佬（新地主席郭炳聯）傾嚇偈」，再由郭炳聯教第三代，佢亦專心做阿仔郭基煇嘅啦啦隊。
佢話新地案嘅經歷令佢學懂放低，但佢強調唔係退休，只係新階段會試嚇做自己鍾意嘅嘢，得閒就同一齊讀書嘅同學仔傾青年問題，令自己心境年輕啲咁。不過大孖沙始終離唔開個市，郭炳江話美國政策有不明朗因素，要跟番住咁，難怪佢一直話自己時間唔夠用啦。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.apple.nextmedia.com
