財經評論：滙豐開fb係好定壞
■滙豐香港又開fb賬戶，又將獅子變彩色撐LGBT，似乎想令形象更年輕。 互聯網
上星期三（30號）滙豐總行擺多兩隻「撐性小眾」的彩色獅子，對睇慣傳統銅獅既中環一族，未知感覺是年輕咗抑或唔多順暢。講開又講，原來同一日，滙豐香港新設立的facebook賬戶（HSBC
Hong Kong）亦悄悄出台，雖然本地不少銀行早已登陸面書，滙豐只是社交媒體遲來的朋友，但見微知著，小小動作已顯示，呢間立足香港逾150年的古老大行，都想追上潮流變得後生啲。
登入專頁，社群目前有2,000多人like，不過貼文內容暫時幾「滙豐」，略見嚴肅，都是環繞一對銅獅日與夜、總行大樓、百五周年紀念同滙豐歷史，跟其他銀行facebook，放滿潮流優惠或投資分析，似乎大異其趣，未知日後滙豐面書，會否像銅獅一樣，變得七彩多姿。
有滙豐人說，銅獅地位一向昭然，神聖不可侵犯，以往複製品都不能隨便改樣，好難想像今天，因支持不同性傾向及跨性別人士（LGBT），容許複製彩虹獅子。咁，時代轉變，作風保守既蘇格蘭大行滙豐，改變突破下，其實是好事。
不過業內人士話，銀行開facebook，最大挑戰是如何管理公開平台的挑機言論，特別金融風暴後，銀行地位已由神壇步落凡間，一有甚麼閃失，隨時在網絡世界，變成陳佐洱口中的小動物。
其實滙豐英國早已設立面書，集團在一些海外市場亦有開戶，但奇怪獅子行搖籃地香港，現在才開立，未知是否因滙豐在港地位特殊，管理賬戶都要深思熟慮啲有關。
本港大行如渣打、恒生（投資服務）、東亞、星展、花旗，以至中型銀行如大新及中資建銀亞洲等，近年都先後開設facebook賬戶。
銀行開面書，無非想更加落地貼近公眾，當作企業社會責任（CSR）的一環，亦順道借公眾平台，推廣宣傳銀行產品服務。但2008雷曼風暴後，銀行業一直不景，凍薪裁員，依然是好多國際大行明年節流重點，本地華資行亦未必可擺脫裁員瘦身命運。
如此形勢下，銀行隨時或因裁員凍薪、增加收費、系統死機等負面消息，在facebook被網民鬧爆，咁就認真無癮矣。聰明啲，應效法個別銀行，集中在面書post投資分析，推財演明星登場，暢論英國脫歐或特朗普當選後最新局勢；或者專攻信用卡積分、食飯購物及飛行里數等優惠，避免碰觸太多企業形象等硬件，費事日後頭痕。
記者：劉美儀
財經評論 舊文
來源 source: http://hk.apple.nextmedia.com
