經濟客艙：中美債市過招
■中美角力戰蔓延，兩國喺資本市場亦互相過招。 資料圖片
男人對住女人，唔只務要知道底褲喺邊度，更重要知道底線係邊度。特朗普未上任已經手多多，不斷觸碰中國嘅敏感位。呢位候任美國總統早個禮拜講一個中國政策主張後，今個星期回應中國截擊深海探測器
，再擺出傲慢嘅姿態：「攞去囉，我哋冇用！」
種種事情，為中美角力戰煽風點火，兩國喺資本市場亦互相過招。美國加息後，美元變得矜貴，衝上近14年高位。早喺美國加息前，中國連續減持美債，截至10月持有美國國債額度為1.1萬億美元，連續五個月縮水，按月計減超過400億美元。美債最大持有國的地位，被美國「跟班」日本取替。不過，中國失落美債最大持有人嘅「虛名」唔太著緊，重要係中國沽美債有起頭作用。睇番美國嘅盟友，講到資金同利益，身體卻很誠實，俄羅斯同日本都喺10月沽美債，確保流動性。
睇番中國外滙儲備10月份數據，跌至3.12萬億元。雖然中國外滙儲備創五年半最低，但仍然為全球最高。外滙儲備佔七成為美元資產嘅中國，持續沽美債搶美金外，亦唔想將雞蛋放哂喺同一個籃。特朗普上任後向中國擺出高姿態，仲未知道中國嘅底線喺邊，就唔好怪中國作出絕地反擊。中國唔怕人仔被沽空，或者貿易戰。前文講到中國外滙儲備嘅數字，其實就係中國沽空美國嘅子彈。以中國外儲數字，可以盡掟一鋪沽空美國，但後果唔使講都知全球市場跌到「七個一皮」，分分鐘真係可以出兵打仗。
Captain Cool
https://www.facebook.com/seeforcaptain/
本欄逢周一刊出
Captain Cool
經濟客艙 - Captain Cool 舊文
來源 source: http://hk.apple.nextmedia.com
