金手指：聯儲局將玩謝侵侵
■筆者認為，聯儲局只要將水抽走，夾嚇息上，賣走手上國債，全球資產市場將會大跌。 資料圖片
建制，其實係乜呢？孫柏文記得個故事，當年克林頓當選花旗國總統，就職日就喺其中一個晚會到，坐咗喺個喺華府權貴社交圈活躍多年嘅闊老太旁。咁克林頓就同佢分享好多雄圖大計，想點
想點，闊老太就靜靜咁聽。臨散場，闊老太卒之開口，就咁贈咗克林頓一句：「Hope you get to stay（希望你留到喺度）。」闊老太呢隻，就係建制。
2016年，全球建制都進入全面捱打狀態。傳媒、學界、大企業、政黨大佬、政府官僚，就算聯合一起，都抵抗唔到英國人脫歐、美國人選「侵」嘅呢個浪。仗，輸就輸咗。不過唔等於戰爭結束。建制一定諗方法反撲。相信大家同我一樣，都聽過啲人估建制會點反撲。暗殺、彈劾等，都有人信會發生。當然，建制同顛覆派嘅角力，又關投資版乜事呢？
我今日講得呢個題目，當然就係建制反撲會直接影響大家啲錢啦！因如要我估，建制中最核心嘅權力機構，必定係各國嘅央行。所以，反撲會喺嗰度來。反撲最容易嘅方法，就係要令人民學一次深痛嘅教訓。咁樣投票，「係有後果」。美國股市、債市、樓市，因多年嘅零息政策，泡沫味濃。聯儲局只要將水抽走，夾嚇息上，賣走手上國債，全球資產市場將會大跌。到時傳媒、學界合作，將呢個跌市推落特朗普、脫歐等現象，就會狠狠咁教訓世人。
到時，希望你喺港股、港樓嘅佈署會令你冇事啦。
孫柏文
獨立股評人
http://www.fb.com/shuen
本欄逢周二刊出
孫柏文
金手指 - 孫柏文 舊文
來源 source: http://hk.apple.nextmedia.com
