【知魚之樂】宏輝三個動作添炒味（唐牛）（JAN 23）
2017-1-23 16:31:30
證監會及港交所（00388.HK）上周五發表聯合聲明，關注創業板新股瘋狂炒作問題，並向保薦人、包銷商及配售代理發出指引，要他們達到操守標準，維護上市公司最佳利益及確保市場廉潔穩定雲雲。
老老實實，創業板淪為啤殼工場唔係一朝一夕嘅事，運作亦非常成熟，要杜絕不是易事，但令炒風降溫卻大把辦法，例如增加股東數目、硬性規定部份公開發售等，已可令幕後人士成本大增，紙上談兵只會給人無牙老虎嘅印象。
啤殼活動無日無之，皆因殼股有價，需求多供應少，自然水漲船高。今日推介冷門股宏輝（00183.HK），有望成為明日之星。宏輝前身為專收舊樓重建的田生，原來大股東區永華已全退，取而代之為創業板殼王龐維新，佢2015年透過摸殼轉售中璽國際（264，前稱卓高）勁賺逾億後，一直未見有新搞作。
點解覺得宏輝會做嘢？三個伏筆逐個數，第一，去年5月批咗逾一成股權出街，每股作價0.15元，疑似係轉手嘅首個動作；第二，龐維新同期出任主席及執行董事，為2011年辭任後翻叮，象徵意義極大。第三，今日新鮮滾熱辣有30球大手上板，每股作價0.177元，約等於1%股權，話唔定係新一輪攻勢嘅開始。公司最新市值5億幾，基本殼價都未夠，市賬率只得0.5倍，變相半價大平賣，現價於一年幾低位橫行，刀仔鋸大樹佳品也！
#知魚之樂 #唐牛
【只要用心，人人都可以係股神！】
https://www.facebook.com/tongcow88
知魚之樂 - 唐牛 舊文
來源 source: http://www.winmoney.hk
