笑到最後：
大時代2.0之焗追
■筆者指出，要追只能追最強勢而一定受惠嘅股份，港交所一定受惠大成交。 資料圖片
港股係咪進入大時代2.0，市場仍有分歧。高明先講結論，建議大家焗追，少少哋都買啲股份。
今年香港有兩個2.0有機會出現，一個係梁振英2.0，另一個係大時代2.0，分別係，大
部份人唔想前者出現，但好想後者出現，不過，兩者都要策略性處理。
兩個2.0未必完全相同，但有相似地方，就係形勢比人強，訊息不對稱。形勢比人強嘅地方係，成交大，肯定同港資無關，股市流傳千億元成交肯定有後著，但同選特首一樣，形勢喺人哋度；訊息不對稱：疑似北水湧港，真正原因冇人知，但北面嘅高層肯定知得更多。
政治上有策略性提名、投票特首候選人一說，因為明知全部都係建制派，推咗佢入局可能有疑點，但更慘重嘅結果係6892.0自動當選，為免歷史重演，寧願揀個冇咁差嘅「造王」。股市操作上亦一樣，為免大時代2.0真係嚟、而嗰刻你又冇貨嘅悲劇出現，焗追係惟一可取嘅平衡。本欄反對追落後股，寧買當頭起，因坊間有太多落後股，近日開始有追中移動（941）落後嘅聲音出現，恐怕有機會成為長期落後股。
要追只能追最強勢而一定受惠嘅股份，港交所（388）一定受惠大成交，騰訊（700）就不斷證明自己係最好挾。因為已經升咗唔少，再重注追好蝕底，只可以買一個夜晚瞓得著嘅水平。
大時代2.0未能完全令人信服嘅原因，就係升幅唔全面，資金集中藍籌股，上述講嘅追強勢股可能會中伏，但策略上焗追。餘下可做嘅，就係等真正大時代2.0發生，成交重上兩千億元以上，短炒波幅博表現。就好似特首選舉策略性投票一樣，博輸咗同現況相若，已經係預期之內，但博贏咗就唔使再捱梁振英2.0。大時代2.0亦一樣，唔嚟，24000點撻落去有限，但真係嚟的話，上望空間肯定較值博。
高明
http://www.fb.com/bigricetea
本欄逢周一刊出
高明
笑到最後 - 高明 舊文
來源 source: http://hk.apple.nextmedia.com
