中環在線：
劉鳴煒客串打鼓扮Cool魔
■劉鳴煒樣靚package正，換上機師造型，師奶少女都要尖叫喇。 設計圖片
華置（127）大股東劉鑾雄個仔劉鳴煒出名package正，對眼又靚，如果佢扮埋Captain Cool係點？聽講佢今年4月又會為協青社一場街舞劇客串，佢舊年負責跳舞，
今年就唔跳嘞，改為打鼓，仲要扮飛機師換上風褸……
協青社旗下有個「嘻哈學校」，透過街舞協助年輕人搵番人生路向，舊年佢哋舉行咗一場街舞劇，今年再接再厲，4月2日舉行一場《東．南．西．北．中》，故事係講一班缺乏人生方向嘅後生仔，藉學習街舞重新搵到方向，即係無論行咗去邊，最後都會行中、行啱。
舊年劉鳴煒客串跳咗一分鐘踢踏舞，今年佢搞搞新意思，唔跳舞，專登走去學打木箱鼓（cajón），屆時會同一班後生嘅街舞舞蹈員jam一jam，大約都係表演一至兩分鐘。
玩木箱鼓嘅人主要坐喺木箱上面，用雙手拍打木箱不同位置，以發出不同聲效，可以玩得好型，但如果真係講型，夾band打嗰種鼓當然更型喇，劉鳴煒不妨考慮學埋佢將來表演喇。
至於點解劉鳴煒要扮飛機師，佢舊年曾經同年輕人分享過佢喺英國成為機師嘅感受，今次可能係劇情需要，又或者純粹扮型啩，大家到時入場睇冷靜啲，咪失控尖叫至好，冇曬儀態呀喂。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.apple.nextmedia.com
