中環在線：跑馬仔帶挈八達通
■張耀堂噚日出席八達通新春團拜。
幾位特首參選人爭住入閘，但講到用八達通入閘，似乎就唔係個個識喇。噚日華華見到八達通行政總裁張耀堂（Sunny），講到𠵱家八達通有幾咁普及，除咗坐車、濕平，仲可以用手機App增值過數，都忍唔住要問一問Sunny，雖則話人
人有張八達通，但點睇參選人林鄭月娥連八達通都唔識用先？
「個個爭做代言人」
Sunny一聽到條問題就大笑幾聲，然後笑住話，多得幾位參選人呢排爭住幫八達通宣傳，好似另一位參選人胡國興，早前抽水，特登走去港鐵站拍片，示範一下究竟點樣用八達通入閘，難怪Sunny都話佢哋「個個爭住做八達通代言人」。
其實Sunny作為八達通CEO，凡係有關八達通嘅新聞、八卦嘢，佢都非常留意。好似最近引起唔少討論嘅大台節目《有樓萬事足》，就有一名23歲女子Macy，聲稱自己每個月儲到105%。Sunny話自己睇完，都估唔到有人因為搭車食飯都用阿媽張八達通嘟，而可以儲到105%，可見八達通已經唔只係一樣普通商品，而係大家日常生活嘅必需品。
不過呢，世界上真係有人唔識用八達通，Sunny就話「第一次唔識，第二次咪識囉」，只不過華華就未見到林鄭第二次用八達通喇。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.apple.nextmedia.com
