智取大市：
市場由沽家話事
■連續兩日有升市主力股票反艇，先有渣打後有滙控。 資料圖片
連續兩日有升市主力股票反艇，先有渣打（2888）後有滙控（005），即市有頗多技術陷阱，例如國壽（2628）即日打上再派貨，個別商品股亦如是，短線資金發現向上突破準繩度低，就開始棄權唔玩，要靠短線
資金向上動力就成疑，事關一突破就有大戶掟貨，市場由買家市場慢慢變成沽家市場。
要等幾耐先變番買家市場？一係透過跌市令股市再度吸引，長線資金肯買貨，買家市場先至強而有力，又或者係出現新衝擊，喺呢兩種情況出現之前，惟有休息嚇。
升市嘅形成，初段係由長線資金買起，當趨勢形成後短線資金先會開始接力。最後連短線資金都買唔起個市，而長線資金又因為超買同估值不便宜未肯加注，就會形成調整甚至跌市。調整同跌市最大嘅分別，係跌到乜嘢價，先再吸引長線資金再加注，呢啲時候就要從基本因素出發，研究股市基本因素係向好方面出發、還是同之前冇分別，其次，再睇市況承接力去判斷長線資金會唔會加注。
港股目前估值就去到熊唔熊、牛唔牛嘅交叉點，至少呢一刻，大家已將內地金融問題拋諸腦後，究竟係咪通脹帶動復蘇嘅預期能夠實現，都係聽住先。
晉佳
http://www.fb.com/advanceguy1
本欄逢周一、三、五刊出
晉佳
智取大市 - 晉佳 舊文
來源 source: http://hk.apple.nextmedia.com
